DUL-AN sa usa ka gatos kalibo nga taga Hongkong ang nag-demonstrate niadtong miaging adlaw didto sa ilang nasod ug nanawagan og hustisya sa nahitabo sa ilang kababayan nga namatay atol sa hostage crisis dinhi sa nasod niadtong miaging semana. Ilang gikondenar ang kagamhanan sa Pilipinas labi pa ni Presidente Noynoy Aquino gumikan sa wala maayong paghawid sa sitwasyon. ‘Philippine Government too bad’. Mao kini ang pipila ka mga napatik sa ilang gipangbitbit nga placards.
Gawas niining demonstrasyon, aduna nay pipila ka mga Filipino domestic helper nga wala na gi-renew ang ilang mga kontrata sa ilang mga amo. Ang uban gipapahawa gyod gani nunot sa maong hitabo. Ang mga Filipino didto balikason bisan naa sa publiko sa mga Intsik. Si Senador Jinggoy Estrada miadto sa Hongkong human sa maong hostage crisis, gi-itsa lang ang iyang passport sa usa ka immigration officer human mahibaw-i nga Filipino siya.
NANIMALOS
Daghan ang nangutana nganong nag-iningon man niini ang taga Hongkong? Dili man unta ang tanang Filipino ang nakasala sa kamatayon sa ilang walo ka mga paisano. Nganong i-trapo man ni Juan ang sala ni Pedro. Aw, misimpatiya lang sila. Tibuok imahin sa Pilipinas ang nakataya ning maong situwasyon. Wala naguba ang imahin ni Pres. Noynoy dinhi sa nasod apan grabe ang epekto sa maong panghitabo sa international community.
Pun-an pa sa ngislit o talidhay ni P.Noy sa iyang pagbisita sa crime scene ug sa iyang presscon, misamot ang kasuko sa taga gawas. Wala pa gayod siya makontak sa chief executive sa Hongkong sa dihang nahitabo ang hostage crisis. Dili maka-eskapo si Noynoy sa responsibilidad sa maong hitabo.
Dakong tamparos kini sa iyang administrasyon. Kon dunay kauwaw si DILG Sec. Jess Robredo ug PNP chief Director General Jesus Versoza, maayo siguro nga mangluwat sila sa ilang katungdanan.
PAHIMANGNO
Magpadala unta og delegasyon ang nasod didto sa China nga panguluhan ni Vice President Jejomar Binay aron makig-diyalogo sa mga opisyal sa maong nasud. Apan mi-ingon ang China nga dili una sila makig-estorya sa mga opisyal sa Pilipinas hangtod nga adunay komprehensibo ug tinud-anay nga resulta sa imbestigasyson kabahin sa maong hitabo.
Sa akong pagsabot ning maong pamahayag, mi-warning na ang China nga klaruhon sa pag-imbestigar ang maong insidente. Kay sila nagtuo nga aduna unyay hawshaw sa imbestigasyon kay mga pulis maoy nahilambigit unya pulis ra usab ang mo-imbestigar.
Karon mirisbak o nanimawos na ang mga Intsik. Kuyaw kon manganhi na sila tanan diri sa Pilipinas unya ihi-an ta. Aw, lunod gyod tang tanan. Bilyon gud nang population sa China.
(bgnalzaro@gmanetwork.com)