DAKO gyud ang kadaot nga nahimo sa nahitabong hostage-taking niadtong Agosto 23 didto atubangan sa Quirino Grandstand sa kaulohan.
Numero unong naapektohan mao ang industriya sa turismo human ang pipila ka mga Chinese national mikanselar sa ilang pagbisita sa Pilipinas isip risbak sa nahitabong hostage-taking nga mikalas og walo ka kinabuhi sa mga turistang Chinese national.
Tinuod dili tinuyoan ang maong hitabo, apan ang di maayong pagdala sa negusasyon ug binolay-og nga paagi aron pagsulbad unta sa maong krisis maoy gibasol nganong misampot kini sa madugoong hitabo.
Sa gusto nato'g sa dili, kini mobanda ngadto sa bag-ong administrasyon nga gipangulohan karon ni Presidente Noynoy Aquino. Dili angay ipahid sa kasamtangang administrasyon ang mga kasaypanan ngadto sa niaging administrasyon.
Law-ay kaayong paminawon nga karon sila na ang nagdala sa renda sa pangagamhanan apan kon duna man gani kapalpakan adto kini ipahid sa miaging pamunoan.
Sa nahitabong kaguliyang karon sa bag-ong pamunoan angay na siguro balik-lantawon ang mga tawo nga gipanudlo ni Aquino nga mangulo sa tagsatagsa niya ka departamento.
Di lang ang sensiridad maoy iyang hatagan og prayoridad kon dili ang kamao ug dunay saktong kalantip sa departamento nga gipangulohan niini.
Kay kon dili, mahimong kingkoy o kataw-anan lang unya ang liderato ni Noynoy kon magsige lang siya og pamutang sa mga tawo nga suod kaniya apan way igong kaalam. Magsige og tudtud o kaha magpataka na lang og pamasangil sa mga kasaypanan. Kini maoy dakong hulga sa iyang pamunoan.