NIPASALIG ang pangulo sa Mandaue City Police Office (MCPO) nga andam silang mohatag og perimeter security sa korte diin adto ipahigayon ang hearing sa mga suspek sa ambush sa magpapatigayong si Debbie Yu.

Nasayran sa miaging semana gikatahong nipainom og binotelyang juice ang managtiayong Marites Velasco, gitumbok nga mastermind, ug Johnjoy Palo-Palo, gitumbok nga lookout, hinungdan sa ilang pagkahilo ug paglubog og duha ka adlaw.

Updates on President Benigno Aquino III's presidency

Ang nihatod sa juice mao ra usab ang inahan ni Palo-Palo kinsa wa na magpakita sa pagkakaron.

Si Senior Supt. Noel Gillamac niingon nga niadto pang miaging semana nakadawat na silag report nga patyon ang mga suspek ilabi na ang mastermind hinungdan nga dali nilang giadto ang bilanggoan, apan mao na lay ilang naabtan nga naglubog na ang duha.

Hinuon di pa matino kon gibutangan bag hilo ang juice sanglit ila pa kining ipahiling sa Bureau of Food and Drugs Administration (BFAD).

Naglisod na sab sila pagpangita sa inahan ni Palo-palo kay wa na kini mopatim-aw sukad sa paghatod og juice.

Apan usa sa gikabalak-an sa mga tinugyanan sa Mandaue City Jail mao ang pagtambong og hearing sa mga suspek tungod kay posebling ambuson kon tinuod man nga dunay nagtinguha sa kamatayon sa mga suspek.

Si Gillamac niingon nga problema na kini sa city jail apan sila andam mohatag og siguridad gawas sa korte.

Nanghinaot si Gillamac nga kon tinuod man nga gibutangan og hilo ang juice maayong mokiha unta ang mga suspek batok kang Nerissa.

Samtang sa ilang bahin, si Senior Insp. Rusylvi Abueva niingon nga kon tinuod nga gibutangangan og hilo ang juice ug di mokiha ang mga suspek,ilang plano nga i-ban na lang ang inahan sa bilanggoan ug di na tugtang makabisita sa Mandaue City Jail.

Ang sobra sa binotelyang juice gikatakda nang ipahiling sa BFAD.(DRT)