AWIT nga “Sugbo” kantahon kada human sa nasudnong awit sa tanang programa nga pagahimuon sa lalawigan sa Sugbo.

Usa ka amendatory ordinance ang gikatakda nga ipasar ni Bokal Julian Daan nga nagmando sa tanang tigpasiugda og mga kalingawan o programa ug mga tunghaan nga kantahon ang “Sugbo” human sa pag-awit sa nasudnong awit.

Updates on President Benigno Aquino III's presidency

Ang kanta nga Sugbo nga orihinal nga komposisyon ni Dr. Susana Cabahug maoy kanunay nga kantahon sa Kapitolyo atol sa flag raising nga himuon matag Lunes.

Tuyo ni Daan nga kantahon kini sa tanang tunghaan ug sa tanang programa o kalingawan.

“Gikinahanglan nato nga atong ipasigarbo kon unsay matahom nga makita sa Sugbo. I-promote nato ang Sugbo,” niingon si Daan.

Gibutyag usab niya nga kini susama ra sa gibuhat sa probinsya sa Bohol nga adunay kaugalingon nga provincial hym, diin kantahon kini sa tanang Bol-anon human sa ilang pagkanta sa nasudnong awit.

Ang awit nga Sugbo molanat og 3 minutos nga kantahon ug ang mga titik sa kanta pulos mapasigarbohon kon unsa ang Sugbo ug ang mga maayong hiyas sa katawhan.

Ang gustong mokuha sa kopya sa maong awit, mahimong makabisita sa buhatan ni Daan.