GIHIMAKAK sa ama-ama ang alegasyong pagpanglugos human nireklamo ang siete anyos nga bata niadtong nilabay'ng adlaw sa Barangay Sugbongcogon, lungsod sa Tagoloan, Misamis Oriental.
Nagdugo ang siete anyos nga batang giilang si Shiela human gi-unay og lugos sa ama ama niining gitagoan sa ngalan nga mao si Romeo, 21, usa ka trisikad driver nga nadiskubre niadtong Domingo mga alas 3:50 sa hapon.
Apan nasayran gikan sa kapolisan sa Tagoloan Police Station nga gustong i-atras sa inahan sa biktima ang kaso ug ipagawas na lamang sa prisuhan ang kapuyo niining gitumbok nga nilugos sa iyang kaugalingon nga anak.
Sa interbyu sa usa ka sibyaan sa radyo ngadto sa suspetsado, gihimakak niini nga milugos siya sa iyang giilang anak human nakig-ipon sa inahan niini.
Gibutyag niini nga bout-bout lamang nga gihimo sa inahan sa bata ang alegasyon human siya masapon niining nakigdulog sa laing babaye ug selos lamang ang gitumbok nga hinungdan hinungdan nga naghimo kini og storya.
Giingong tungod sa kalagot sa inahan sa siete anyos, nanumangil kining gilugos ang anak aron makabalos ug mapriso.
"Karon, gusto nako niya pagawason sa prisuhan kay iya man nahuna-hunaan nga wala gyod nako gilugos ang iyang anak," matud sa suspek.
Gani ang kapolisan naglibog pag-ayo kung kinsay tuohan sa hitabo human usab miguwa nga positibong gilugos ang biktima. Kahinumduman nga nasapon mismo sa inahan sa bata nga nipatong ang iyang kapuyo human mihilak ang anak.
Sa kasamtangan, gikostudya sa Department of Welfare and Social Development ang biktima. (SVB)