PATAY na nga napalgan ang usa ka 21 anyos nga lalaki human gituohang nalumos niadtong Lunes mga alas 11:30 sa buntag sa Maandig Beach, Bonbon ning siyudad sa Cagayan de Oro.

Si SPO2 Fernando Laspoña sa Police Station 4 (PS4) sa Carmen niila sa biktima nga mao si Lucas W. Dela Cruz, ulitawo, lumad nga taga lungsod sa Kadingilan, Bukidnon.

Post your reaction to the Manila hostage crisis

Matud ni Laspoña nga nahinabi sa Sun.Star SuperBalita nga nangaligo sa maong beach ang biktima kuyog ang mga higala niini mga alas 9:00 pa sa buntag niadtong adlawa.

Pipila ka minuto gikan sa pagligo-ligo kalit lang kining nawala hinungdan nga gipangita sa mga kauban.

Apan mga alas 11:30, nakita na kini nga gidagsa daplin sa baybayon ug wala nay kinabuhi kinsa nanglagom na ang lawas sa biktima.

Pagrespondehan sa kapolisan gikan sa PS4 ang maong hitabo ug walay nakitang mga samad niini apan gihangyo ang pamilya sa biktima nga ipa-otopsiya ang patay'ng lawas sa posibleng gilumsan usab ang biktima.

Samtang walay kamatuoran ang nigawas nga taho nga hubog ang biktima samtang naligo sa dagat labina nga mismo ang mga kauban niini niingon nga pag-abot sa dagat wala na kini nag-inom ug deretso na kining naligo.

Ang patay'ng lawas ning panahona kasamtangan nga gidala sa Bollozos funeral parlor nga gikatakdang ipa-otopsiya. (Stephanie V. Berganio)