UNOM ka mga police trainees ang na-ospital alas 6:00 sa gabii niadtong Lunes didto sa siyudad sa Cotabato.
Gibutyag ni Cotabato City Police Director Willie Dangane nga samtang nanihapon ang mga biktima, kalit silang mibati og sobrang kasakit sa tiyan ug nagsuka-suka unya naggawas ang hugaw.
Dali nga gisapupo ang mga police trainees ug gidala sa Cotabato Regional and Medical Center (CRMC) ug padayon pa silang gi-obserbahan sa mga mananambal.
Sumala ni Dangane nga usa sa ilang gilantaw nga hinungdan sa hitabo mao ang tubig nga gi-inom sa mga biktima gikan sa gripo sa Cotabato City Water District (CCWD) gumikan kay niadtong orasa nahutdan sila og mineral water.
Apan si CCWD General Manager Attorney Delfin Helario nagpahayag nga maayo ang ilang tubig ug dili kontaminado sa bisan unsang bakterya.
Hangtud karon nagdumili pa si Dangane sa pagpagawas sa bansagon sa mga police trainees ngadto sa mga sakop sa media gumikan kay wala pa mapahibawo ang ilang pamilya.
Gitahasan na ni Cotabato City Mayor Japal Guiani ang mga personahe sa City Health Office nga sutaon ang hinungdan sa maong insidente. (Edgardo Fuerzas)