TULO ka mga lalaking suspek sa pagpusil patay sa usa ka batan-on nasikop sa kapulisan didto sa lungsod sa Carmen, Davao del Norte, Lunes sa buntag.

Mga dinakpan nailhan nga mao sila Jhonny Banez, 19, alyas Junmar, 16, ug si alyas Elton, 16, ug pulos molupyo sa Barangay Ising, lungsod sa Carmen.

Post your reaction to the Manila hostage crisis

Sa report gikan sa Carmen Municipal Police Station, nasayran nga pasado alas 8:00 sa buntag nasikop sa mga miresponding kapulisan ang tulo ka mga suspek didto sa Barangay Ising.

Ang tulo maoy gitudlong mipusil patay sa biktimang si Noli Javier, 18, ug molupyo sa Barangay Ising.

Alas 6:30 sa buntag niadtong Lunes, napalgan ang biktimang si Javier nga wa nay kinabuhi nga nagbuy-od sa may Purok 4, Barangay Tuganay ug dunay samad pinusilan sa kalawasan.

Gisikop sa mga otoridad ang mga suspek tungod kay sila maoy gidudahang mipatay sa biktima. Ang katahap gipasikad sa taho nga sila maoy nakit-ang ulahing kauban sa biktima Sabado sa gabii samtang nag-inom sa usa ka tindahan sa Barangay Tuganay.

Nakuha gikan sa posisyon sa mga dinakpan atol sa pagsikop kanila ang usa ka .22 nga pistola ug sumpak nga maoy gituohang gigamit sa pagpamusil.

Mga suspek gipangtanggong sulod sa selda.

Kapulisan sa lungsod sa Carmen mihimo na og dugang imbestigasyon sa hitabo. (Marvin Pineda)