USA ka wa mailhing ginang nabanggaan patay sa usa ka de-pasaherong bus didto sa Kilometro 53, National Highway, Barangay Visayan Village, siyudad sa Tagum, Lunes sa gabii.

Sa report gikan sa Tagum City Police Station, nasayran nga nahitabo ang aksidente pasado alas 7:00 sa gabii sa dihang nagdagan ang usa ka Metro Shuttle Bus nga dunay plate number LWA-996 nga gidrayban sa usa ka Zandro Marapon, 36, ug molupyo sa lungsod sa Sta. Cruz, Davao del Sur.

Post your reaction to the Manila hostage crisis

Ang bus gikan sa siyudad sa Davao paingon sa siyudad sa Tagum sa dihang nahitabo ang disgrasya.

Pag-abot sa atbang sa may Lakan Pakals Restaurant sa maong lugar, aksidenting nabanggaan ang biktima nga mitabok sa dalan.

Nabunal ang biktima, resulta sa pagkahiagum niya og mga grabing pangos ug bun-og sa kalawasan.

Daling gidala sa Davao Regional Hospital sa may Barangay Apokon ang biktima apan gideklarang dead on arrival sa mga doktor.

Ang drayber sa bus nga si Marapon mitahan dayon ngadto sa mga otoridad.

Gihulagway lamang ang biktima nga anaa sa 40 anyos pataas ang edad.

Gipahiluna na karon sa usa ka punerarya ang patay'ng lawas sa biktima samtang gipaabot ang mga tagtungod nga moila kaniya.

Ang kasong reckless imprudence resulting to homicide gihikay na batok sa drayber sa bus. (Marvin Pineda)