USA ka 73 anyos nga lola kinsa namaligya og tuba ang gitigbas sa usa ka mag-uuma didto sa Sitio Pag-Asa, Barangay Bagong Negros, lungsod sa Kiblawan, Davao del Sur.
Banda alas 6:30 ang takna sa sayong kabuntagon niadtong Lunes, namahaw og samad tinigbasan sa agtang ang biktimang si Estrella Mabangis, biyuda ug lumolupyo sa maong lugar.
Si PO3 Allan Dave Parantar, desk officer sa kapulisan sa maong lugar, nagkanayon nga ang suspek mao si Efren Daligdig, 56, ug nagpuyo ra sab sa maong dapit.
Matod niya nga ang suspek naka-inom og bino nga nagbitbit og sundang nga maoy gigamit pagtigbas sa agtang sa 73 anyos nga biktima.
Ang biktima gidali paghatud sa Gregorio Matas District Hospital apan hangtud sa pagsuwat ning balita wala pa mahibaw-i kon unsa na ang iyang kahimtang.
Ang suspek nasikop nila ni Barangay Kagawad Romeo Labandoc, kinsa maoy nitabang pagdala kaniya didto sa Kiblawan Police Station. (Dondon Dinoy)