GOBERNADOR Gwen Garcia nikondenar kang actress Gloria Diaz tungod sa pagsulti niining ang mga Cebuana maglisod sa pagsulti og Iningles o Tagalog.
Si Garcia niingon nga way kasing-kasing ug way saktong panghuna-huna si Diaz sa iyang pagluwat niini nga maisip nga mga pulong pagtamay sa mga Sugboanon.
“Kasi when you think about a Cebuana can hardly speak English and of course Tagalog. Maybe she should answer in Bisaya,” kutlo sa mga taho sa gisulti ni Diaz sa usa ka interview sa ABS-CBN.
Ang gobernador andam nga mopaluyo sa resolusyon ni Bokal Agnes Magpale nga nagkondinar kang Diaz tungod sa iyang mga pagsaway.
Matod pa sa gobernador nga iyang huwaton nga moabot sa iyang lamesa ang kopya sa resulosyon ni Magpale aron iyang estudyohan kon angay bang isipon nga “persona non grata” sa Probinsya.
Niingon ang gobernador nga siya natingala nganong nasulti kadto ni Diaz.
“I strongly support condemning Diaz for her statement....I’m really disappointed,” matod sa gobernador.
Matod niya nga estrekto ang mga tunghaan dinhi sa Sugbo sa English subject ug daghan na usab nga mga call center ang natukod dinhi tungod sa kadaghang mga Sugboanon nga makamao nga mosulti sa pinulongan nga English. (JFT)