DANCER sa Comparsa sa Mandaue namatay human nakuyapan tungod sa severe dehydration nga maoy gitumbok sa mga mananambal nga hinungdan sa iyang pagkamatay.
Apan ang ilang dance instructor niingon nga tulo na kini ka adlaw nga waa maka-apil sa
ilang practice tungod sa hilanat.
Hinuon ang kagamhanan sa dakbayan sa Mandaue nipasalig nga mohatag og hinabang sa pamilya ni Wilfritz Jake Passadaba, taga barangay Polpogan, lungsod sa Consolacion.
Si Passadaba namatay sulod sa Mandaue City District Hospital niadtong Dominggo sa hapon.
Si Pasasadaba naa sa fourth year high school sa Mandaue City Science High School ug nisayaw sa cluster no.6 sa Comparsa sa Mandaue diin nasakop sila sa barangay Ibabao.
Ang principal sa tunghaan nga si Rosario Casilagan niingon nga niadtong Sabado sa gabii wala na kini makasayaw sa dihang kalit nga ni-collapse ug daling gidala sa tambalanan.
Si Oliver Figuroa, dance instructor, nibutyag nga si Pasasadaba tulo na ka adlaw nga wa mosalmot sa ilang praktis tungod kay gihilantan.
Base sa report ni Doctor Oscar Quirante, pangulo sa Mandaue District Hospital, ang namatayan mao ang gitawag og acute renal failure secondary to severe dehydration.
Hinuon nasayran gikan ni Kapitan Jun Del Mar sa Ibabao diin nasakop ang ilang cluster nga ilang nahukman nga ang P50, 000 nga premyo nga second prize kuhaan og P10,000.
Gani ila na kining nahatag sa ginikanan.
Samtang ang kagamhanan sa dakbayan sa Mandaue nisaad na usab og P20,000. Si Pasasadaba second year pa nga niapil sa sayaw ug ang katapusang gisalmotan niini mao ang sa Capiz alang sa One Visayas Festival. (DRT)