LALAKENG giingon nga nalisoan sa pangisip nakabuhi gikan sa kadena nga gigamit sa paggapos kaniya kagahapon sa buntag.

Nikuha siya og sundang ug nag-wild sa ilang dapit sa Brgy. Don Gregorio Antigua, lungsod sa Borbon Sugbo.

Updates on President Benigno Aquino III's presidency

Ningresponde nga mga pulis nga naglakip kang PO3 Edgar Novabos napugos sa pagpusil sa tuong tuhod ni Rogelio Malang Quinal, 31, ulitawo dihang sila gihasmagan bisan sa ilang warning shot.

Sa sayo pa, ang mga barangay official nakigsulti kang Quinal nga motahan nga malinawon, apan napakyas sila pagkombinser.

Nag-wild na hinuon kini og maayo hinungdan nga napugos ang mga barangay official sa pagpangayog panabang sa kapulisan.

Nangabot sila si Novabos ug nipaila silang mga pulis kang Quinal apan wa gyud kini mokalma.

Gihasmagan pa silang mga pulis hinungdan nga gipasalbahan siya.

Padayon gihapong nipaduol si Quinal nga nagdalag sundang hinungdan nga si Novabos napugos pagpusil kaniya mga 10-12 metros aron pag-neutralize kaniya.

Maayong pagkaigo sa iyang tuong tuhod ug gitabangan sa pagdala sa Juan Dosado Memorial Hospital sa lungsod sa Sogod, apan gibalhin dayon sa Vicente Sotto Memorial Medical Center (VSMMC) alang sa dugang pag-atiman, labina kay nalisoan na siya sa pangisip.

Nasayran sa kapulisan nga si Quinal nisuway sa pagsunog sa ilang balay sumala sa iyang inahan.

Gawas niini, gikatahong nisuway pa kini sa pagtigbas sa usa ka tanod hinungdan nga ilang gi-neutralize ug gigaid aron di na mag-wild.

Si PO2 Rey Suson sa Borbon police niingon nga dugay nang nalisoan sa pangisip si Quinal ug makadaghan na kini makabuhi gikan sa kadena.