ANDAM mohatag og seguridad ang Police Regional Office (PRO-7) kang Jed Carlo Lazaga, usa ka 4th year student sa College of Law sa University of San Jose Recoletos (USJR) ug sakop sa student and bar operations.
Si Lazaga maoy gipasanginlang naglabay og granada niadtong Dominggo sa hapon sa kaulohan human sa bar exam.
Kini maoy gipasalig ni Chief Supt. Ager Ontog Jr., director sa PRO-7, human sa pagbisita nila ni Atty. Jonathan Capanas, dean sa USJ-R College of Law ug mga staff niini, sa buhatan ni Ontog kagahapon sa hapon diin gipadangat niini ang ilang hangyo.
Si Ontog niingon nga andam sila paghatag kon mangayo gyud ug security escort si Lazaga, apan sama sa protocol mosubay kinig insaktong proseso sama sa pagkuhag approval sa Commission on Elections (Comelec) nga moagi sa Regional Joint Security Protection Office (RJSPO)bisan pa man kon di kini usa ka kandidato.
Hinuon giklaro ni Ontog, nga PRO-7 way labot sa imbestigasyon sanglit duna nay giumol nga Special Task Force ang Manila Police District (MPD) aron pagtumbok sa uban pang mga nalambigit sa maong krimin.
Subay niini, gipahibawo ni Ontog, nga ilang monitoron ang mga fraternity dinhi sa Sugbo aron malikayan ang mga frat-war.
Alang kaniya wala na kinahanglana pa nga dunay ipahigayong dayalogo sa mga sakop sa fraternity dinhi sa Sugbo human sa nahitabo sa kaulohan.
Samtang si Capanas nipadayag nga grabe ang trauma nga nahiaguman ni Lazaga.
Gani ila kining hatagan o stress debriefing kay wa na kini moeskwela.
Giklaro niya nga way bisan using nipatim-aw nga nisang-at og kaso batok sa ilang tinun-an human kini gipasanginlang maoy nilabay og granada ug gikulata, ingon man gidakop sa mga pulis sa Malate.
Samtang si Cebu Regional Trial Court (RTC) Executive Judge Meindrado Paredes kinsa mismo didto sa Manila niadtong higayona niingon nga lugak ang seguridad sa dapit nga nahitabuan sa pagpamomba human sa bar exams. ang libuang mga tinun-an didto sa Manila niadtong Dominggo.
Nitumbok si Paredes nga gawas ug sud sa dapit nga gipahigayonan sa Bar exam nagpasad ang mga ilimnong makahubog.
Iyang gisaysay nga way ambulansya ug stretcher sa nahitabuan sa pagpamomba.
Gani, gipangkarga lang og pribadong sakyanan ug taxi kadtong mga nabiktima human sa pagpamomba.
May sugyot si Paredes nga did-an na kining paghudyaka human sa pagkuhag Bar exam ug i-ban ang mga ilimnong makahubog kay sa higayon nga makagawas ang tinun-an sa gawas, maligo man gyod gani silag beer.
Subay niini, ang huwes nisuporta sa awhag ngadto sa Korte Suprema nga ma-decentralize na ang Bar exam nga di na sa Manila mokuha sa exam kadtong mga tinun-an sa abogasiya gikan sa Visayas ug Mindanao aron di mameligro ang ilang kinabuhi sama sa insidente niadtong Dominggo.