TULO ka mga tawo ang mitugpa sa balay tambalanan human sa nahitabong aksidente sa dalan didto sa lungsod sa Padada, Davao del Sur niadtong Huwebes sa hapon.

Drayber sa motor nga nakabangga, apil ang iyang asawa nga angkas ug ang biktima gihatud sa duha ka managlahing tambalanan.

Post your reaction to the Manila hostage crisis

Si Melfred Albiso, minyo, way trabaho, nagpuyo sa lungsod sa Sulop, Davao del Sur, nitabok sa national highway didto sa NCO District, lungsod sa Padada, Davao del Sur.

Apan wa niya mamatikdi ang naghaguros nga kolor pula nga Honda XRM 110 nga motorsiklo, nagbaton sa plakang LQ-8603 ug nakarehistro sa ngan ni Lilia Momo Oliverio sa Barangay San Jose, siyudad sa Digos hinungdan nga nabanggaan siya.

Ang motorsiklo gimaneho sa usa ka Daryl Dale Oliverio ug angkas niini ang iyang asawa nga Charisa, ug pulos nagpuyo sa lungsod sa Malalag, Davao del Sur.

Sumala ni PO2 Danny Moalong sa Padada Police Station nga nagsubay sa dan gikan sa habagatan padung sa amihanang bahin sa lugar ang motorsiklo apan pag-abot sa atubangan mismo sa United Sugarcane Planters Association of Davao del Sur nabanggaan ang biktima.

Nilagpot ang drayber ug ang iyang asawa sa gisakyang motorsiklo human naligsan ang biktima.

Ang tulo pulos nahiagum og pangos ug bun-og sa kalawasan.

Ang biktima gihatud sa Davao del Sur Provincial Hospital (DDSPH) samtang ang magtiayon didto sa Sunga Hospital.

Padayon pang mihimo og imbestigasyon ang kapulisan bahin sa disgrasya. (Dondon Dinoy)