ANG Criminal Investigation and Detection Group (CIDG) nanghunaw kon nganong way nadakpan sa kadaghan sa mga Last 2 operators sa probinsiya sa Davao del Sur.
Si Superintendent Rodel Calo, CIDG provincial commander, nagkanayon nga maglisod silang ilambigit ang mga financier sa taknang mohimo og ronda sanglit way direktang ebidensiya nga maglambigit kanila sa ilegal nga sugal.
Apan gipasiatab sa CIDG nga sukad sa bulan sa Enero, siyam na ka mga Last 2 attendants ang ilang nadakpan ug pulos nag-atubang karon sa kasong paglapas sa Presidential Decree 1602 sa gi-amenda nga Republic Act 9287 kun anti-illegal gambling law.
Matud ni Calo nga bisan wa pa nagsugod ang hugot nga kampanya batok ilegal nga sugal dugay ra silang nagsige og panakop.
Gipamatud-an sa CIDG ang ilang "Operation Roullete" sa gihatag nga datos sa CIDG Superbalita ug nailhan ang mga gikasohan nga mao sila si Theresa Uy, 25, dalaga, nagpuyo sa Purok 23, Barangay Santol, Midsayap ug Hazel Ramos Gemoros, 25, taga lungsod sa Libungan, pulos sakop sa probinsiya sa North Cotabato, human sila nadakpan niadtong Septyembre 7.
Nakuha sa ilang posisyon ang mga Last 2 paraphernalia ug kantidad nga P540.
Niadtong Marso 22, nadakpan sab sila si Annie Garcia Monte, 22, ug Narissa Reyes, 22, dalaga ug taga Hinatuan, Surigao del Sur ug Aireen Jane Culim, nagpuyo sa Purok 3, lungsod sa Midsayap, North Cotabato. Nakuha gikan kanila ang salapi nga taya kantidad og P1,240.
Niadtong Marso 3, 2010, nasikop sila si Anastacia Petalcorin, 44, minyo ug last two coordinator didto sa Padada Overland Transport Terminal. Nakuha gikan sa iyang posisyon ang kantidad nga P780.
Enero 27, 2010, nasikop sab si Arwyn Alpos Pilledo, 39, minyo, nagpuyo sa 2325 Estrada 2nd Subdivision, sa siyudad sa Digos human nakuha sa iyang kamot ang kantidad nga P1,139.
Laing mga suspek pa nga sila si Ellyn Paras, 27, dalaga, taga Barangay Bangoy, siyudad sa Panabo, Maureen Tamagod, 20, nagpuyo sa Barangay Gumasa, Glan, Sarangani Province ang nasikop ug naaktuhang nagpataya ug nakuha sa ilang posisyon ang kantidad nga P1,630.
Namatikdan nga sagad sa mga nagpataya og last 2 nidayo lang sa lalawigan mao nga nanaghap ang CIDG nga organisado ang sugal nga last 2 sa probinsiya.
Si Calo niingon nga usa ka financier nga nailhang si Ben Bacar, ang ilang gilambigit sa kaso apan ang piskalya mismo ang nagtaktak niini sanglit way lig-ong ebidensiya nga maglambigit kaniya.
"Hearsay lang man gud siya. Ang problema man gud kay madakpan ni ilang mga tauhan di gyud ni motug-an sa tinuod kinsa ilang financier kay kinsa pa may mo-piyansa nila," pung ni Calo.
Hinuon, nagbahad ang CIDG nga di sila moundang sa kampanyan nga sumpoon gyud ang Last 2 lukop sa probinsiya sa Davao del Sur.
Matod sa CIDG nga apilon sab og pasaka og kaso ang bisan kinsa nga masakpan nga motaya og Last 2.
Ang tricycle drayber nga si Michael de Mesa, 45, taga dakbayan sa Digos, nagkanayon nga dugay ra siyang nibiya og patad sanglit iyang nahuna-hunaan nga mas dako siya og pildi ug talagsa ra modaug sud sa usa ka bulan.
"Di gyud mabawi ang imong pildi bisan og modaug pa ka," niya pa.
Gipabuhagay sab niya nga daghan gihapon ang nagtago-tago og pataya sa siyudad sa Digos.
Usa ka di magpailang lumolupyo nagbutyag nga di gyud masulbad ang maong sugal hangtod nga dunay koneksyon sa pulis ang mga nagduwa niini.
"Mag-raid lagi sila unya makapangandam man kay kadtong mga pulis nga nagdawatan og payola mo-text man dayon to sa ila mao nga manirado dayon ang mga last 2 outlet pag-abot sa pulis," tin-aw pa niya. (Orlando B. Dinoy)