ANG pamilya sa gilugos nga staff nurse sa South Upi Municipal Hospital sa probinsiya sa Maguindanao naghangyo karon sa gobyerno nga ibalik ang silot nga bitay.
Hangtud karon anaa pa sa kritikal nga kahimtang si alyas Neneng, 21, sa usa ka balay tambalanan sa siyudad sa Cotabato.
Angayan lamang silutan sa kamatayon ang mga suspek gumikan sa niluog nga gihimo nila sa dalaga, matud sa amahan sa biktima.
Gibutyag ni Criminal Investigation and Detection Group (CIDG-Armm) Chief Superintendent Jacinto Malinao nga anaa na sa ilang kostudiya ang unom ka mga suspek nga sila Michael Candelario, Jeffrey Fernandez, Glen Saldua, Roscon Sanglap, Darwin Escalona ug Eugene Biscarra,ug pulos mga molupyo sa Barangay Timanan, South Upi.
Gipasalig ni Jacinto nga walay pagmaniubra sa imbestigasyon sa kaso sa mga suspek nga gitumbok nga pamilya sa mga inilang politiko ug opisyal sa kapulisan.
Gikalipay sab ni Maguindanao Integrated Provincial Health Office (IPHO) Chief Dr. Tahir Suliek ang aksiyon ni Department of Justice (DOJ) Secretary Leila de Lima nga tahasan ang National Bureau of Investigation (NBI) nga motabang sa imbestigasyon sa paglugos sa biktima nga miyembro sa Nurses Assistance for Rural Services (NARS) program sa Maguindanao.
Mismong si Maguindanao Governor Esmael "Toto" Mangudadatu ang nangunay sa pagtabang sa pamilya sa biktima aron makab-ot ang hustisya sa dalaga nga gilugos. (Edgardo Fuerzas)