ANG principal sa Mabini National High School nagklaro kagahapon nga di tinuod nga iyang gikasab-an ang ilang estudyante mao nga naghikog patay niadtong Miyerkules.
"Sa pagkatinuod, wala gyud ko nakakita sa bata. Dugay na siya nga wala mi-eskwela. Ingon sa iyang adviser nga August 12 pa daw wala na mitungha ang bata sa iyang klase," ni Mary Jean Abadia, principal, dihang nahinabi sa Superbalita pinaagi sa telepono kagahapon.
Si Abadia mitawag sa Superbalita aron maklaro ang pasangil nga nagpakamatay si Hardie Niño Escalante, 17, 4th year student, sanglit iyang gikasab-an tungod kay peke ang gisumiti niini nga Form 137.
"Transferee na siya dinhi sa Mabini National High School gikan sa Catalunan Pequeño National High School. Dugay na namo siyang gipangayuan og Form 137. Dihang iya nang gi-submit sa adviser, natingala siya kay dagko man kaayo og grado. Among gi-trace sa iyang eskwelahan ug among nahibaloan nga iya lang gipahimo ang card," pasabot ni Abadia.
Si Abadia nagbutyag nga wa gayud gikasab-an ang bata mao nga natingala siya dihang miguwa sa mantalaan nga nagpakamatay ang biktima kay iyang gikasab-an tungod sa peke nga card.
Base sa blotter sa San Pedro Police Station, si Escalante nasiplatan sa iyang igsuon nga si Rancel Escalante nga nagbitay sa door jam sa ilang balay didto sa Monfort Avenue, Circumferential Road, Barangay 19-B Poblacion, ning siyudad.
Si Rancel nangayo dayon og police assistance aron tabangon ang iyang igsuon kinsa nagbitay gamit ang duha ka bakus nga gihigot sa iyang liog.
Nabadbaran lamang ang biktima dihang miabot ang mga sakop sa kapulisan uban sa mga paramedics sa Central 911.
Ang igsuon sa biktima nagbutyag sa kapulisan nga nahiubos ang iyang igsuon tungod kay gikasab-an sa ilang principal, sigun sa imbestigasyon ni SPO2 Nelson Ladua sa San Pedro Police Station. (AD)