LAING duha na sab ka tawo ang sunod-sunod nga gipusil sa wa mailhing mga mamumuno dinhi sa siyudad sa Davao.

Ang usa gibanatan sud sa ilang balay sa alas 10:30 sa gabii niadtong Huwebes samtang ang laing usa gipusil samtang gidawat ang plite sa iyang pasahero sa alas 4:45 sa kaadlawon kagahapon didto sa Mercury Drug, Matina Crossing.

Post your reaction to the Manila hostage crisis

Gipusil sud sa ilang balay mao si Mark Anthony Eborda, 20, ulitawo ug nagpuyo sa Blk. 1, Lot 10, San Lorenzo Village, Puan.

Si Eborda nakaangkon og samad sa iyang ulo, dughan, tuong bukton ug ilok nga miresulta sa iyang kamatayon, sigun sa imbestigasyon ni Police Officer 2 Roman Agor Jr. sa Talomo Police Station.

Si Fara Eborda, 41, nagbutyag sa kapulisan nga natulog siya sulod sa ilang lawak dihang iyang nadungog ang sunod-sunod nga buto sa armas mao nga gisusi dayon sa iyang live-in partner nga si Roel Caube, 29.

Sa ilang pagsusi, suma sa inahan sa biktima, maoy misugat sa ilang mga mata nga nagkadugo na ang biktima didto sa ilang kusina.

Gituohan nga gisundan ang biktima gikan nagpalit og balot sa gawas ug dihang nakasulod na siya, gisaka sa suspetsado ug didto gipusil siya sa makadaghan nga higayon.

Duha duha ka baseyo sa bala sa .45 kalibre nga pistola ang nahipus gikan sa crime scene sa mga sakop sa Scene of the Crime Operatives (Soco).

Labing uwahing biktima sa pagpamusil mao si Arnold Dumandan, 38, habal-habal driver ug nagpuyo sa Kilometro 6, Barangay Matina Pangi.

Si Dumandan gipusil sa wa mailhing tawo dihang iyang gidawat ang plite sa iyang pasahero didto sa Mercury Drug, Matina Crossing.

Ang biktima nakaangkon og samad sa iyang ulo ug dihang natumba na siya, giusban pagpusil sa killer ang biktima tumong sa ulo, liog ug dughan nga miresulta sa iyang kamatayon.

Mga nakasaksi nagbutyag nga ang mamumuno nagtabon og face towel sa iyang nawong, nagsul-ob og jacket ug maong nga pantalon kinsa daling misakay sa nagpaabot kaniya nga motorsiklo pipila ka metros ang gilay-on sa crime scene.

Kalibre .45 nga pistola gihapon ang gigamit sa killer base sa mga baseyo nga nahipus sa mga sakop sa Soco nga gipangulohan ni Police Inspector Garcia.

Mga biktima atua karon gihaya sa Collado Funeral Homes samtang gihimo sa kapulisan ang makuting imbestigasyon. (AD)