HUMAN masuta nga dunay depekto ang mga barangay project sa dakbayan sa Sugbo, nitumaw na sab ning isyu sa posibleng overpriced nga mga ballpen.
Napalgan sab ang pipila ning mga ballpen nga depektuso.
Kon tinuod nga ang mao nga mga ballpen overpriced kay tag P12 ra man ang baligya sa pipila ka educational supply stores, hayan lain na sab ni nga palusot diha sa City Hall.
Gikinahanglan nga susihon ni og maayo ni Mayor Mike Rama samtang sayo pa. Kon tinuod ni, posible kaayong ang ubang office supplies sa City Hall overpriced pud.
Ipakita niya sa mga Sugboanon nga kahibawo siyang manglimpyo sa balay nga gitugyan kaniya sa mga botante.
Di ra ba ang kagamhanan ang natikasan sa matag palusot sud sa mao nga institusyon, kon di ang publiko.
Di ni angay pasagdan ug isipon nga ordinaryo nga hitabo kay bisan nisubay ni sa naandan nga proseso sa pagpamalit og office supplies, wa man ni magpasabot nga way anomaliya ang pagpamalit niini.
Mahimo ra man sa mga bidder nga magsabot kinsay ilang padag-on sa bidding. Mahimo ra man nga piskan sila sa ginansya sa supplier nga makadaog.
Gamay ra tan-awon ang mao nga mga transaksyon, apan usa gihapon kini ka matang sa palusot ug pangurakot.
Di kini mahitabo nga way opisyal nga nalambigit o kakunsabo.
Aron mawagtang ang pagduda nga dunay nakasapi nga opisyal sa City Hall, mas maayong ipasusi kini og maayo sa mayor.
Sutaon kon wa bay anomaliya sa mga pagpamalit.
Apilon og susi ang naandan nang proseso kay basin tungod sa kadugay, nakakitag buslot ang mga mapahimudsanon.