NAGTINGKAGOL sa National Bureau of Investigation (NBI) ang kanhi mayor sa lungsod sa Sta. Fe, Sugbo human gisikop siya tungod sa giatubang niyang kaso sa Sandiganbayan.
Si kanhi Sta. Fe Mayor Roger Illustrisimo gikombikto sa Sandiganbayan sa kasong serious physical injuries nga gisang-at sa usa ka day care worker nga si Catalino Veliganilao niadtong 2004.
Gisentensyahan si Illustrisimo nga mabilanggo sud sa upat ka buwan ngadto sa duha ka tuig sa Sandiganbayan 4th Division apan nipasaka siyag petition for review on certiorari ngadto sa Korte Suprema sa iyang pagkakombikto.
Ang Korte Suprema nibasura sa gisang-at nga petisyon sa kanhi mayor hinungdan nga nipakanaog og bench warrant ang Sandiganbayan nga nagmando nga sikupon siya.
Kagahapon, gipahigayon sa mga ahente sa NBI 7 ang pagsikop kang Illustrisimo didto sa iyang gipuy-an sa Sta. Fe ug gidala siya sa buhatan kagahapon sa hapon.
Gikatakdang magtingkagol siya sa NBI sukad kagabii ngadto na sa Lunes kay ang Sandiganbayan nga atua nagbase sa Manila adto siya ipresentar.
Si Atty. Rod Bagaslao, abogado ni Illustrisimo, niingon nga gitun-an niya karon kon unsay ilang sunod lakang ning sitwasyon sa kanhi mayor.
Nipahibawo si Bagaslao nga hayan moawhag sila sa Korte nga ipaubos sa “probation” si Illustrisimo ilabi nang mosobra sa duha ka tuig ra man ang iyang sentensiya.
Sa iyang bahin, ang kanhi mayor nitug-an nga nadawat niya ang kamanduan sa Sandiganbayan ug buot niyang sa Lunes na niya asikasuhon apan wa siya magtuo nga ang mga ahente sa NBI modakop diay niya kagahapon didto sa ilang lungsod.
Nahitabo ning giatubang nga kaso ni Illustrisimo tungod sa insidente niadtong Hulyo 28, 2004 dihang gipangayo niya ang permit sa disco ug ubang kalihokan sa Barangay Pooc nga gipahigayon sa basketball court.
Apan, giingong giatake niya si Veliganilao pinaagi sa paghapak og pistola nga naigo ang baba ug nangatangtang ang tulo ka mga ngipon sa biktima. Gikataho nga namatay na ang biktima mga duha ka tuig na ang nakalabay.
Niadtong higayona, nagsilbi si Illustrisimo sa iyang ikaduhang termino isip mayor sa Sta. Fe. Ning higayona ang iyang asawa nga si Jennifer mao nay mayor.
Sa pagkakaron, usa na ka sibilyan si Illustrisimo kay wa na siya magpapili sa milabayng piniliay niadtong Mayo.