GIHIMAKAK sa mga suspek nga nadakpan nga duna silay kalabutan sa paglugos sa 21 anyos nga health worker sa Maguindanao.
Gikanayon ni Ronald Biscarra nga igo lamang mitabang ang iyang igsuon ug ang iyang mga barkada sa biktima aron dad-on sa balay tambalanan.
Matud pa ni Jeffrey Fernandez nga sa diha nga namauli na sila gikan sa usa ka videoke house, ilang naagian kilid sa kalsada si alyas Joy nga nagkadugo, hinungdan nga ila dayon kining gisapupo ug gidala sa South Upi Municipal Hospital.
Giangkon hinuon ni Eugene Biscarra nga iya ang t-shirt nga nakuha sa mga pulis apan nangatarungan nga iya kadtong gihukas aron nga itabon sa hubo nga lawas sa biktima.
Natingala sab ang mga pamilya sa unom ka mga suspek kon nganong gisikop sila nga sila man unta ang mitabang aron nga madala ang biktima sa ospital.
Gihangyo sa mga pamilya sa mga suspek si Maguindanao Governor Esmael "Toto" Mangudadatu nga tabangan gumikan ang tinuod nga mga suspek mao ang mga anak sa pamilya sa mga inilang politiko ug opisyal sa kagamhanan sa maong dapit.
Sa pikas bahin, hinay-hinay nang naka-rekober ang biktima sa iyang gidangatan kinsa gibalhin sa Davao Doctors' Hospital kon diin ang mga opisyal mismo sa Autonomous Region in Muslim Mindanao maoy miabaga sa galastuhan sa dalaga. (Edgardo Fuerzas)