GIRONDA sa kapulisan ang usa ka hantakan didto sa dakbayan sa Digos apan mga gamit sa sugal lang ilang nahipos human paspas nga nanagan ang mga suspetsadong sugarol.

Si Chief Inspector Anthony Padua sa intelligence section sa Davao del Sur Provincial Police Office (DCPO) maoy nangulo sa ronda. Kini human nadawat ang taho kalabot sa pasugal didto sa Barangay San Miguel, siyudad sa Digos.

Post your reaction to the Manila hostage crisis

Banda alas 3 sa hapon, Biyernes, sa dihang niabot ang kapulisan aron panakpon ang mga sugarol nga nagduwa og hantak apan paspas nga nakatimaho sa ilang pag-abot mao nga nagdali sa pagsibat.

Gibilin sa mga suspek ang usa ka antugon, steel round nga ring ug mga salaping sugal nga managlahi ang denominasyon, nga niabot tanan ang kantidad og P155.

Ang salaping nakuha sa kapulisan giingong anaa sa kostudiya sa supply section sa DDSPPO.

Pakyas sab ang kapulisan nga mailhan kinsa ang operator sa hantakan.

Luyo sa nahitabong ronda, gihulagway nga padayon gihapon ang pagkuyanap sa sugal nga Last Two sa dakbayan ug padayong gawasnon ang mga financier kay way bisan usa kanila nga nasikop.

Padayon ang pagsumpo sa kapulisan sa mga ilegal nga sugal sama sa hantak, tari-tari ug tong-its lukop sa probinsiya. (Dondon Dinoy)