ANG kapulisan nangita na karon sa mga mamumuno nga mipusil patay sa duha ka mga tawo kinsa sunod-sunod nga gipusil sa wa mailhing mga mamumuno dinhi sa siyudad sa Davao.
Ang usa gibanatan sud sa ilang balay sa alas 10:30 sa gabii niadtong Huwebes, samtang ang laing usa gipusil samtang gidawat ang plite sa iyang pasahero sa alas 4:45 sa kaadlawon kagahapon didto sa Mercury Drug, Matina Crossing.
Mga imbestigador sa Talomo Police Station mipalawom sa ilang imbestigasyon aron masayran kung kinsa ang nagpatay kang Mark Anthony Eborda, 20, ulitawo ug nagpuyo sa Blk. 1, Lot 10, San Lorenzo Village, Puan.
Si Eborda nakaangkon og samad sa iyang ulo, dughan, tuong bukton ug ilok nga miresulta sa iyang kamatayon.
Si Fara Eborda, 41, nagbutyag sa kapulisan nga natulog siya sulod sa ilang lawak dihang iyang nadungog ang sunod-sunod nga buto sa armas mao nga gisusi dayon sa iyang live-in partner nga si Roel Caube, 29.
Sa ilang pagsusi, suma sa inahan sa biktima, maoy ilang nakita nga nagkadugo na ang biktima didto sa ilang kusina.
Dunay miguwa nga anggulo nga gipatay ang biktima sa mga tawo nga nasuko kaniya tungod iyang di maayong binuhatan sa ilang lugar.
Samtang gisusi ang kamatayon ni Eborda, gisusi sab ang mga anggulo sa kamatayon ni Arnold Dumandan, 38, habal-habal driver ug nagpuyo sa Kilometro 6, Barangay Matina Pangi.
Si Dumandan gipusil sa wa mailhing tawo dihang iyang gidawat ang plite sa iyang pasahero didto sa Mercury Drug, Matina Crossing.
Ang biktima nakaangkon og samad sa iyang ulo ug dihang natumba na siya, giusban pagpusil sa killer ang biktima tumong sa ulo, liog ug dughan nga miresulta sa iyang kamatayon.
Mga nakasaksi nagbutyag nga ang mamumuno nagtabon og face towel sa iyang nawong, nagsul-ob og jacket ug maong nga pantalon kinsa daling misakay sa nagpaabot kaniya nga motorsiklo pipila ka metros ang gilay-on sa crime scene.
Kalibre .45 nga pistola gihapon ang gigamit sa killer base sa mga basiyo nga nahipus sa mga sakop sa Soco nga gipangulohan ni Police Inspector Garcia.
Gisusi karon sa kapulisan ang taho nga ang biktima sakop sa Alimasag Group nga responsable nga sunod-sunod nga tulis dinhi sa dakbayan. (AD)