IPAHIGAYON karong adlawa ang 7th leg sa 2010 MS Motosuit Motorcross Series nga giulohan og 1st Mayor Nelson Gamaliel F. Garcia Motocross Competition sa Dumanjog, Cebu.

Nagkanayon si MS Motosuit big boss Lou Ornopia nga ang lumba gisuportahan sa local government sa lungsod sa Dumanjog pinanguluhan ni Mayor Nelson Gamaliel Garcia ug sa iyang bise nga si Christopher Baricuatro apil na ang mga sakop sa Sangguniang Bayan.

Updates on President Benigno Aquino III's presidency

Gipasalig ni Ornopia nga masaksihan sa mga taga lungsod sa Dumanjog ang kulbahinam ug makalingaw nga lumba sa mga hari sa motocross dinhi sa Kabisay-an ug Mindanao.

Gilauman nga mosalmot ang top riders dinhni sa Sugbo nga gipanguluhan nila ni Jonjon Adlawan, 2009 Rider of the Year, ug MS Motosuit endorser John Flores.

Ang 2008 Rider of the Year nga si Seigfred Ornopia maoy mihimo sa desenyo sa race track.

Nagsuporta sa MS Motosuit Motocross Series mao ang Castrol Power One, Local Government of Dumanjog, ug DYRC Cebu, ang official radio station sa lumba. Matag Dominggo sa alas 3:00 sa hapon ngadto sa alas 5:00, ang DYRC Sports motuki sa labing ulahing kalambuan sa MS Motosuit Series.