TUGBOK district, Davao City—Ania ako ning maong lugar gumikan kay mitambong ako sa lubong sa akong iyaan nga namatay niadtong miaging semana. Gilubong kagahapon ang akong iyaan nga si Bernarda ‘Mama Narda’ Nalzaro Julapong, kinsa namatay sa pangidaron nga 82 anyos. Ang mga igsuon god sa akong anhing Tatay ania na manimuyo diri sa Davao human sila milalin gikan sa dakbayan sa Dipolog niadtong mga dekada 60. Lumad kaming taga Dipolog City.

Updates on President Benigno Aquino III's presidency

Ang Tugbok district mga 20 kilometros gikan sa kinapusuran sa dakbayan. Sa wala pa ako molahos diri niadtong BIyernes, mihapit una ako sa haya ni Marcelino ‘Dodong’ Gabito, akong kauban kaniadto sa Bombo Radyo Cebu, kinsa namatay gumikan sa atake sa kasing-kasing. Gikan sa Bombo Radyo Cebu, mibalhin si Dodong sa DYAB (ABS-CBN) niadtong 1995. Wa magdugay mibalik siya diri sa Davao, ang iyang yutang natawhan ug nakatrabaho sa ABS- CBN ug RGMA Davao. Katapusan siyang mitrabaho sa Bantay Radyo Davao sa wala pa siya mamatay.

KALAMBUAN

Ang dakbayan sa Davao mao ang pinakadakong siyudad sa tibuok kalibutan in terms of land area. Kusog kaayo ang paglambo sa ekonomiya diri. Hinuon, dili sama sa Cebu, wala kaayoy mga tag-as nga edipisyo imong makita sa kinapusuran sa dakbayan. Siguro ang pinakataas nga building diri mao ang Marco Polo Hotel nga adunay 14 ka andana. Ang rason diha gumikan sa kadako pa sa yuta, puwede pang maka-expand ang mga negosyante sa ilang mga building nga dili kinahanglan nga patas-an pa.

Tiaw nimo kanang bisan mga 80 kilometros gikan sa siyudad sama anang boundary sa lalawigan sa Bukidnon, sakop gihapon na sa Davao City. Kon diri sa Sugbo pa na, pila na ka lungsod ang maagi-an. Diri walay lungsod, puro barrio. Limpiyo ang entiro dakbayan. Ang mga kalsada wala kaayoy libaong. Apan bisan pa sa kalapadsa ilang kalsada, mag-traffic man gihapon usahay. Milipang ang ubang industriya sama usab ang gitawag nga Business Process Outsurcing (BPO) o kanang mga call centers nga sama sa Cebu nakatabang usab sa employment sa mga Davaowenos.

KAHAPSAY UG KALINAW

Well of course, nasayod naman ta diri sa Davao nga dili maka-ugpo ang mga kriminal gumikan kay gipamatay anang gitawag nga Davao Death Squad. Gani niadtong Biyernes sa buntag, pag-abot nako diri, dunay usa ka notadong kriminal ang gipusil patay. Ang atong mga kaubanan sa media diri mikonpirmar kabahin sa sunod-sunod nga pagpamusil sa mga kriminal. Ang ubang sektor labi pa ang mga human rights group mitumbok kang kanhi mayor ug karon bise mayor Rodrigo Duterte nga maoy nagpaluyo niini. Apan wala silay ebedensiya. Ang mayor karon mao ang anak ni Duterte nga si Sarah ‘Inday’ Duterte Carpio. Morag nagpangurog ang mga kriminal diri.

(bgnalzaro@gmanetwork.com)