DAGHAN kaayo ta og mga balaod nga wa gyud mapatuman o nalimtan na lang.

Sama sa balaod batok sa paggamit og wang-wang kun siren nga panahon pa diay sa administrasyon ni anhing presidente Marcos gipalabang, apan sa administrasyon lang karon ni Presidente Benigno Aquino III napatuman.

Updates on President Benigno Aquino III's presidency

Kon wa maghisgot si Noynoy og way wangwang nga gamiton sa mga tawo nga naa sa gahom o niadtong mga impluwensyado sud ning iyang administrasyon, wa gyud ni masayri nga naa na diay daan nga balaod batok ini.

Dihang dunay smoking ban sa mga pampublikong mga dapit ingon man sa pampublikong mga sakyanan, daghan ang nagbantay.

Kusog kaayo ang pagpanakop sa mga tawo nga manigarilyo sud sa sakyanan, bisan drayber pa ang masakpan.

Naa say balaod alang sa pagtaod og seatbelts sa mga sakyanang pasaheroan.

Sa bag-o pa, nagmatngon gyud og maayo ang mga operator ug drayber nga di sila makalapas. Kon makakitag awtoridad sa trapiko ang mga drayber, maratol gud sa pagpataod sa seatbelt sa naglingkod sa frontseat.

Mao lagi, maayo lang sila ini basta bag-o pa, apan nagkadugay, nagkalugak ang pagpatuman.

Tan-awa lang gud sa smoking ban sud sa mga sakyanang pampubliko, naa bay nagtagad sa pagpatuman ini?

Mibalik na sab ang pagpanigarilyo sa mga pasahero ug mga drayber ug igo ra sang tan-awon sa mga awtoridad.

Ang nakapait man gud kay nasod kita sa daghang mga balaod. Apan naa man gud tay batasan nga maayo lang sa pagsugod. Maorag kugon nga kon dagkutan dali kaayong mosilaob, apan dali sab nga mapawong.