GIABANDONAR nga mga balay sa Tierra Grande sa Camella Homes, Lawaan-I, Talisay City ang gihimong suyopanan sa mga adik.

Kagahapon sa buntag, si kapitan Jonathan Tumulak nangulo sa iyang mga konsehal ug mga tanod sa pag-inspection sa giabandonar nga mga balay ug nakuha ang daghan kaayong mga tinfoil nga gituohang gigamit sa mga adik sa pagsuyop og shabu.

Sa pakighinabi sa Sun.Star Superbalita, si Tumulak nibutyag nga tulo ka mga balay nga nahimutang sa Block5-Lot16 ,Block 9-Lot 68 ug Block 17-Lot 2 ang gipanggamit nga suyopanan sa mga adik.

Updates on President Benigno Aquino III's presidency

Gihimo na kaniadto ni Tumulak ang pag-inspection sa giabandonar nga mga balay niadtong konsehal pa siya ug maoy chairman sa committee on peace and order sa konseho.

Daghan sab ang nakuha nila nga mga shabu paraphernalia kaniadto.

Ang operasyon gihimo kagahapong adlawa gisugdan untop sa alas 7:00 sa buntag ug nitapos pasado na alas 8:00.

Si Konsehal Rogelio Paradero nibutyag nga gawas sa mga tinfoil, may nakita sab sila nga mga kandila nga gituohang apil sa gamitunon sa mga adik pagsuyop og shabu.

Ang hepe sa mga tanod nga si Rolando Lasola nakaobserbar nga dunay mga giabandonar nga balay ang gipangpuy-an na lang sab sa laing pamilya nga di home-owners.

Si Tumulak nipasabot nga gihimo nila ang operasyon human ang mga homeowners nipahibawo nga dunay giabandonar nga balay nga gihimong suyopanan sa mga adik.