USA ang patay samtang duha ang nangaangol sa managlahing mga pagpamusil sa dakbayan sa Danao sa miaging gabii nga naglambigit sa mga menor de edad sa Villa Soccoro, Brgy. Suba sa mao nga dakbayan.
Ang biktimang namatay giilang mao si Remund Jasmin, 18, ulitawo, trisikad driver samtang ang suspek nga nipusil kaniya makadaghang mga higayon mao ang usa ka lalakeng menor, taga Sitio Pulangbato, Brgy. Looc.
Ang suspek dunay laing duha ka mga kaubang menor usab.
Si SPO1 Jose Salingua, desk officer sa Danao police station nga nahinabi sa Sun.Star Superbalita, nagkanayon nga si Jasmin nagduwa og basketball dihang niagi ang pito mga menor de edad apil na sa tulo ka mga suspek.
Giingong ang pito ka mga batan-on nga sakop sa rugby boys padulong nga moduaw sa ilang higala nga gilubong sa sementeryo sa nahisgutang lugar apan giingong gibugalbugaln sa biktima atol sa ilang pag-agi.
Sa pagbalik, ang tulo maoy ningduol sa biktima sanglit ang upat ka mga kaubang batan-on niini nanguli.
Diha-diha gipusil sa 16-anyos ang biktima ginamit ang .357 caliber revolver diha sa tiil, dughan, ingon man liog nga maoy hinungdan sa hinanalaling kamatayon niini.
Daling ningsibat ang mga suspek.
Sa pikas nga bahin, kritikal usab ang kahimtang sa usa ka menor de edad human sila gipusil sa wa mailhing tawo samtang nangatulog kagahapon sa kaadlawon sa Brgy. Guinacot, Danao city.
Samtang samdan sa iyang ulo si Junrey Fernandez,17, nagpuyo sa nahisgutang lugar, ingon man ang iyang higala nga si Dejie Maurillo, 13, taga Brgy. Guinacot sa nahisgutang dakbayan.
Giingong ang mga biktima uban sa ilang upat pa ka mga higala nga nangatulog sa usa ka payag dihang kalit lang girakrakan..
Ang mga biktima giatiman sa mga doctor sa Vicente Sotto Memorial Medical Center (VSMMC).
Wa magdugay pipila ka oras, laing nabiktima sa pagpamusil didto sa Poblacion, Danao ang usa ka trisikad driver nga si Joselito Pasion, 45, minyo, nagpuyo sa nahisgutang lugar.
Matod pa sa biktima nga samtang natulog siya sa ilang balay uban sa iyang pamilya nakamata nalang sila tungod sa sipang buto sa armas.
Dihang gisusi, ilang nakita ang silingan nga si Romy Amoroto nga nagdalag armas nga nipugos sa pagsulod sa ilang balay.
Diha-diha gipusil ang biktima kinsa naigo sa iyang agtang, dughan, ug walang kamot.
Samtang ang suspek daling nakasibat human sa pagpamusil.
Ang biktima gitabang sa mga kabanay ug gidala sa tambalanan.