KAMPANIYA sa pakigbatok sa dengue sugdan sa mga tunghaan nga ipaagi sa mga school principal ug mga tinun-an.

Kini maoy nauyonan atol sa gihipahigayon nga inter-agency meeting nga gipasiugdahan sa Department of Health (DOH)7 niadtong miaging adlaw tungod sa padayong pagsaka sa mga kaso.

“We should re-activate the ‘little dengue brigade’ sa mga tunghaan,” pamahayag ni DOH-7 Regional Director Dr. Susana Madarieta.

Updates on President Benigno Aquino III's presidency

Nipasabot si Madarieta nga ang mga tinun-an padad-on og asin ingon man ang pagbutang niini sa napundo nga tubig.

Ilang nakita ang kaepektibo sa maong paagi sa dihang gihimo kini sa lungsod sa Cordova, Sugbo dihang nisaka ang mga kaso sa dengue.

Gawas niini, ang DOH moapod-apod og treated curtains nga adunay anti-mosquito chemical sa Barangay Guadalupe, Labangon ug Tisa sa dakbayan sa Sugbo nga gipaubos sa dengue outbreak sukad niadtong Miyerkules.

Ang tulo ka mga barangay gibutang sa dengue outbreak tungod sa padayong pagsaka sa mga kaso.

Ang Brgy. Guadalupe kanunay nga nag-una sa listahan sa mga barangay nga dunay labing taas og kaso sa dengue sa dakbayan sa Sugbo.

Samtang si Cebu City Health Officer Dr. Stella Ygoña nga nagpadayon ang ilang subsob nga search and destroy operations ngadto sa mga nahisgutang barangay.

Sumala pa nga ang 66 ka mga tunghaan ug 48 ka mga classroom sa matag tunghaan aporan og tag-duha ka mga kurtina nga adunay chemical sa pagpatay sa lamok.

“The method is safe and economical,” dugang pa ni Ygoña. Ang maong chemical nga anaa sa kurtina di makahilo ug mamahimong gamiton sud sa tulo ka buwan bisan kono kini gilabhan na sa makatulo ka mga higayon.