TALANDUGON ang kahimtang sa usa ka manindahay og kaka human gipusil sa laing mamaligyaay nga giingong iyang gipuhalan sa pagpamaligya kagahapon sa buntag sa Poblacion Ward 1, lungsod sa Minglanilla, Sugbo.
Samdan sa walang bahin sa kilid sa iyang lawas si Jenero Aying Cabarrubias, 40, minyo, taga Brgy. Basak Pardo,human gipusil sa wa mailhing lalake nga mamaligyaay usab og kaka.
Si SPO1 Renato Masangcay, imbestigador sa kapulisan sa Minglanilla police station nga nahinabi sa Sun.Star Superbalita nagkanayon nga mga alas 9:30 kagahapon sa buntag, si Cabarrubias nag-display sa iyang mga kaka alang sa derby.
Ang wa mailhing lalake namaligya sab og kaka tupad sa eskwelahan sa elementarya sa nahisgutang lugar.
Matod pa ni Masangcay nga kalit lang ningdagsaa ang mga kustomer nga naglangkob sa mga tinun-an ug estambay.
Dunay ubang mga customer nga namalit og mga kaka alang sa derby apan kalit lang nisangko sa mainitong panaglalis ang pagpamaligya kay nagpuhalay ang duha sa ilang presyo.
Dihang niinit ang panaglalis sa duha, kalit nga nilanit sa iyang gidala nga wa matinong kalibre sa armas ang gunman ug gipusil ang biktima makausa tumong sa walang bahin sa lawas.
Ang biktima daling gidala sa mga tawo sa Minglanilla District Hospital samtang ang gunman daling nisibat palayo sa lugar.
Wa gyuy bisan usa ka tawo sa dapit ang nakaila kaniya. “Karaan man gud na siyang (Cabbarubis) mamaligyag kaka diha sa lugar.Pulos sila day-o pero ang biktima nipadayag nga iyang pakyawon ang tanang kaka sa suspek. Nagpuhalay sila sa presyo dihang gidagsa sa mga customer,” sumala pa ni Masangcay.
Giingon nga tag P20 ang presyo sa matag kaka alang sa derby nga pakyawon unta sa biktima nga maoy gikasakit sa suspek human kini gibiay-biay.
Gipadayag niini nga kusog ang sugal sa kaka sa Minglanilla.
Gani base sa ilang nahibaw-an moabot ngadto sa tag P2,000 kapin ang pustaanay sa derby sa kaka.
Hinuon sila sa kapulisan, bisan kon way ordinansa niini ang lungsod nga nagdili niini, andam silang manakop sanglit usa kini ka illegal nga sugal nga makadaot di lang sa mga tinun-an kon di sa tanang mga tawo nga hilig sa sugal.
Dugang niya nga ang hitabo maoy labing unang higayon nga dunay pagpamusil sa lungsod sa Minglanilla nga naglambigit sa kaka.
Ang biktima giingong gibalhin sa usa sa mga tambalanan dinhi sa dakbayan sa Sugbo kay naa sa kritikal nga kahimtang.
Nagproblima usab ang kapulisan sa Minglanilla sanglit ang mga tawo didto sa lugar pabiling tak-om.
Apan dako ang ilang pagtuo nga ang gunman ilang mailhan pinaagi sa abag sa testigos nga ilang mahuptan.