USA ka lalaki kritikal ang kahimtang sulod sa ospital human gidunggab sa wa mailhing suspek didto sa Premium Market, siyudad sa Panabo, Sabado sa kaadlawon.

Nailhan ang biktima nga mao si Erwin Borbon, 19, ug molupyo sa Purok Durian, Barangay Cagangohan, dakbayan sa Panabo.

Post your reaction to the Manila hostage crisis

Sa report gikan sa Davao del Norte Police Provincial Office nasayran nga pasado alas 3:30 sa kaadlawon naglingkod lamang ang biktima daplin sa dalan sa maong lugar, dihang kalit nga miabot ang wa mailhing lalaki ug sa way paglangan gidunggab ang biktima gamit ang usa ka mahait nga hinagiban katulo ka higayon.

Nahiagum og samad dinunggaban sa iyang dughan ang biktima ug daling gidala sa Somozo Hospital sa siyudad sa Panabo.

Apan tungod sa grabing samad nga nahiaguman gibalhin siya sa Davao Regional Hospital sa siyudad sa Tagum.

Ang suspek abtik sab nga misibat padulong sa wa matino nga lugar human sa pagpanunggab.

Kapulisan sa siyudad sa Panabo mihimo na og dugang pakisusi sa maong hitabo aron ilhon ang suspek ug motibo sa pagdunggab. (Marvin Pineda)