USA ka gitudlong karnaper nga nisibat gikan sa dakbayan sa General Santos ang nasikop sa kapulisan sa probinsya sa Davao del Sur sayo sa buntag kagahapong adlawa.

Si Rio Pacin, 26, ulitawo, nagpuyo sa Purok Malakas, sa maong siyudad, nadakpan sa kapulisan sa lungsod sa Padada, Davao del Sur.

Post your reaction to the Manila hostage crisis

Si Ronald dela Rosa, provincial police director, nagkanayon ang suspek maoy gitudlong nagkuha sa Honda XRM 125 nga motorsiklo, nagbaton sa plakang MG 4701.

Ang motorsiklo gipanag-iyahan ni Melvin Salazar, 27 anyos, minyo ug salesman didto sa Buayan townsite sa GenSan.

Banda alas 7 ang takna sa buntag, ang grupo ni Senior Police Officer 1 Rodolfo Magtoto, nakarekober sa motorsiklo gikan sa posisyon sa suspek human niabot ang biktima nga nangayo og tabang ngadto ni Palili Barangay Kapitan Ptolemy Lanticse, human nasayran nga anaa sa lugar ang iyang sakyanan nga niadto pang Septembre 21 nahanaw.

Way nahimo ang suspek human nahimong ebedensya ang paghupot niya sa motorsiklo aron atubangon ang kasong carnapping nga isang-at sa otoridad. (Dondon Dinoy)