ANG Kalipunan ng Damayang Mahihirap (Kadamay) wa malipay sa tinguha nga ipatuman ang 100 porsiyento nga pagsaka sa kontribusyon PhilHealth gikan sa P300 kada tulo ka bulan ngadto sa P600 pinaagi sa pagyawyaw nga ang free health services alang sa mga kabus “less accessible and less affordable.”
Kini ang pahayag ni Kadamay spokesperson Franchie Buhayan isip reaksiyon sa lakang ni Pangulong Benigno “Noynoy” Aquino III nga ipatuman ang 100 percent increase sa contribution sa PhilHeath.
Bisan nga ang PhilHealth dunay P120 billion non-moving assets, ang gobyerno mopatuman hinuon sa 100 percent increase sa PhilHealth aron tubagon ang demand sa private hospitals nga makasingil og higher fees ug kabahin kini sa Private-Public Partnership scheme ni P.Noy, pahayag ni Buhayan.
"Maglisod naman gani og bayad ang kasagaran sa P300 nga philhealth, unsa pa kaha karon nga mas mahal na ang balayronon," ni Buhayan sa Superbalita.
Siya nagsulti, "Duna bay pagbag-o sa kahimtang sa kabus sa nasud nga pangayuan naman hinuon kami og mas taas nga balayronon sa Philhealth? Klaro man kaayo nga pagpangwarta kini sa gobyerno."
Si Buhayan nagsaway sa tinguha sa pangulo sanglit di mahitabo ang damgo niini nga daghan ang pagpamiyembro sa PhilHealth.
"Nagdamgo ang administrayon ni Aquino nga mas daghan ang magpamiyembro sa Philhealth. Sa kalisod sa kinabuhi karon, samot nga dili mudaghan ang makakuha sa serbisyo sa Philhealth," padayag ni Buhayan.
Ang gihimo ni Aquino, suma ni Buhayan, sukwahi sa pahayag sa pangulo sa iyang State of the Nation Address. Ang proposed 2011 national budget nagpakita nga dunay pagkunhod sa alokasyon sa 55 ka mga pampubliko nga hospital sa tibuok nasud. Ang administrasyon ni Aquino, mikaltas sa P1.67 billion gikan sa subsidiya sa gobyerno alang sa National Health Insurance Program. Ug kini kini ang hinungdan nga ipatuman sa administrasyon Aquino ang pagsaka sa kontribusyon sa Philhealth.
"Ang angay himuon sa gobyerno mao ang pag-undang pagbayad sa utang sa gawas, pag-undang sa pagpangutang ug ang pagpataas sa badyet sa panglawas," panapos ni Buhayan. (AD)