GIBUN-OG ni pound-for-pound champion Manny Pacquiao ang iyang mas taas ug mas dakong sparring partner nga si Michael Medina sa miaging adlaw sa ilang upat ka rounds nga kombati sa Cooyesan Sports Complex sa Baguio City.
Human sa ilang sparring session, ang 6-footer nga si Medina nakaangkon og bun-og sa ibabawng bahin sa iyang wala nga mata bisan nagsulb-og pa kini og head gear.
“He was fast and strong,” paghulagway ni Medina kang Pacquiao, kinsa gikatakdang makigharong sa kababayan ni Medina nga si 5’11” Antonio Margarito karong Nobiyembre 13 sa Dallas Cowboys Stadium.
Sa interbyu sa www.abs-cbnnews.com, nagkanayon si Medina nga gisunod gyud niya ang estilo ni Margarito nga kanunay lang moasdang apan idlas lang gyud kaayo si Pacquiao.
“I gave him my best work. I tried to go forward and tried to fight like Margarito,” dugang ni Medina.
Si Pacquiao nipadayag nga malipayon gyud kaayo siya sa iyang ensayo kay daghan siya’g nakat-unan sa pagpakigbatok og tag-as nga kontra sama ni Medina.
“Reach advantage [ni Margarito] ay first concern…kailangan lang naka-focus [kung] paano counterin,” batbat ni Pacquiao, World Boxing Organization (WBO) welterweight
champion.
Kuntento sab kaayo si American trainer Freddie Roach sa gipakitang away ni Pacquiao batok kang Medina.
Hinuon gitataw ni Roach nga kinahanglan pa gyung hashasan pa og maayo ni Pacquiao ang iyang tayming aron mapekpekto na ang tanan.