IPATAAS ang kamot kon buot ka mobarog ug mopadayag sa imong nahunahunaan.

Apan nia’y pangutana nga nindot unta matubag dayon sa mga maalamon mahitungod sa atong mga magtutudlo: Unsaon paghatag og igong pagtagad aron mouswag ilang kahimtang?

Updates on President Benigno Aquino III's presidency

Sayod bisan ang labing bulok kon kinsa’y kaabag sa mga ginikanan sa tahas pagpahayag sa alimpatakan ug balatian sa kabatan-onan. Masikwate ug maimpatso gyod ang gidamgong kauswagan ugma damlag kon wala’y gakutas pag-atiman sa mga tunghaan. Bisan daginuton intawon kaayo ang ilang suholan, wala kini makapugong sa mga magtutudlo pagmatuod kon nganong angay lang nga ibantog ang ilang katungdanan isip “the most noble profession.”

Kay dili kutob ra sa pagtudlo mao’y gidangat nilang gimbuhaton. Wala po’y kataposan ang ilang kahago kay bawnon man gihapon nila hangtod sa tagsa-tagsa nilang panimalay ang salin sa ilang mga tulomanon sa tunghaan, sama sa pag-check sa mga papel sa ilang mga tinun-an ug pagpuwaw og andam sa ilang lesson plan. Gawas pa niana—bahala na’g barikoson sila’g tinindog ug hubakon sila’g palanog sa ilang pahinumdom—sayod pod ta nga sagad sila mao’y saligan pagdumala sa mga botante panahon sa piniliay.

Hastang sayopa kon gatuo ka nga wala na sila’y dugang pa nga atimanonon.

Gikataho nga sila manginlabot na pod pagpakgang sa mga hinampak nga lamok nga gadala anang makatiurok nga dengue. Sa dakbayan sa Sugbo, diin padayong gadagsang ang mga kaso sa dengue, makig-alayon ang mga tunghaan duyog sa kampanya sa Department of Health (DOH)7. Ilang pahinumdoman ang mga tinun-an sa kamahinungdanon pagbutang og asin sa mga dapit diin gapundo ang tubig.

“Teaching in the Philippines is heroism in itself,” matod pa ni Efren Peñaflorida, ang 2009 “Hero of the Year” sa CNN, sa iyang pakigpulong sa nasudnong panagtapok sa mga mga magtutudlo dinhi sa dakbayan sa Sugbo bag-ohay lang.

Ipahigayon suhod karong petsa -5 ning buwana ang pagsaulog sa World Teachers’ Day.

Tipik sa tibuok buwan nga kalihokan sa Department of Education ang pag-awhag sa katilingban ang pagpadayag og pasalamat nilang Sir ug Ma’am. Kining kampanya nga gitawag og “My Teacher, My Hero” mao’y pag-ila ug paghangad sa bantayogon nga binuhatan sa mga magtutudlo.

Apan labing matinud-anon ang pagdayeg sa mga magtutudlo kon ang pasidungog alang nila duyogan pod unta og mga kaayohan alang sa mga magtutudlo nga kadaghanan gianinohan sa mga tigpatanto. Labing malungtaron nga bugti sa ilang kaligdong , kaalam, ug kahago ang pagpauswag sa ilang sweldo. Niining paagiha, makaingon ta nga dili lang diay kutob ra sa laway ang atong pagsaludo nunot sa mga tinun-an nga matahoron kaayong mopataas sa ilang kamot.

(geemyko@gmail.com)