PATAY ang usa ka lalaki human miambak sa merkado sa Cogon niadtong Sabado mga alas 2:00 sa hapon.
Giila ang namatay nga mao si Benjie Marcos, 32, minyo, taga Blk-23, Lot-29., PN Roa Subdivision, Calaanan ning siyudad sa Cagayan de Oro.
Sa inisyal nga imbestigasyon sa kapolisan sa Police Station 2 (PS2) sa Cogon nasayran nga anaa sa third floor nga bahin ang biktima niadtong tungora ug giingong nakig-inom hinungdan apektado og ilimnong makahubog.
Dihang gustong mokanaog miagi kini sa hagdan gamit ang steel frame hinungdan nga aksidenteng nadigyas ug nahulog. Nabunal ang ulo sa semento ug bun-og ang lain-laing parte sa lawas.
Pagresponde sa mga polis nadala na ang biktima sa Northern Mindanao Medical Center (NMMC) ug gibutyag sa mga doctor nga nakaangkon kini og fractured skull gawas pa sa bun-og sa lawas.
Pipila ra usab ka oras ang nilabay nakabsan sa iyang kinabuhi ang biktima.
Pipila usab nga mga tawo nga nakadungog sa maong insidente nabalaka ug nangutana kung unsay pulos sa escalator sa merkado ug nganong dili man kini gamiton.
Ang kapolisan nanawagan usab nga magbinantayon kanunay sa pagkanaog labina kung adunay paliton sa 2nd floor ug third floor nga bahin sa merkado. (Stephanie V. Berganio)