NAHIMONG kontrobersyal ug init kaayo ang debate sa Reproductive Health (RH) Bill (HB 5043) tungod sa duha ka mga gamhanang grupo nga misupak ug uyon sa sugyot nga balaudnon, ang simhanang Romano Katoliko ug non-government organizations (NGOs) sa pikas habig.
Ang duha parehong naghisgot kabahin sa ‘katungod sa pagpakabuhi’ apan managlahi lang ang ilang paghubad.
Ang simbahan, tigbantay alang sa moralidad, niangkla sa ilang pagsupak subay sa pagtulun-ang Kristiyanismo nga ‘way katungod ang tawo sa pagpakgang ug pagkutlo sa kinabuhi nga gasa sa Magbubuhat.’
Ang NGOs ug ubang nagsuporta sa pagduso sa RH Bill nagbase sa ekonomika, diin ilang gibasol ang paspas nga pagtubo sa populasyon nihatag og komplikasyon sa kalisod sa nasod ug pagkontrol sa populasyon maoy ilang nakita nga labing maayong solusyon sa pagpalambo sa kahimtang sa katawhan ug paghaw-as sa nasod gikan sa kalisdanan.
Hinuon, ang duha ka magkaatbang nga grupo nagkauyon bahin sa maayong pagplano sa pamilya ug responsableng pagka ginikanan.
Sa pagkatinuod, dunay daghang maayong mga punto sa RH Bill ug ang hugot nga gisupak lang sa simbahan mao ang paggamit sa bisan unsang artipisyal nga tambal ug pamaagi sa pagkontrol sa pagpanganak. Nabalaka usab ang simbahan nga motaas nga imoralidad.
Samtang dunay ubang pang pangutana: Nganong gikinahanglang himoan pa kini og balaud? Unsay lawom nga papel sa United Nations (UN) bahin sa RH Bill? Di ba dugay na ang family planning program sa kagamhanan?
Daghan pa kaayong isyu nga naglimin sa RH Bill nga angay natong pakisayran aron mas undanon ang pagpabor o pagsupak niini.