MOABOT karong buntag si Department of Interior and Local Government (DILG) Secretary Jesse Robredo alang sa kasaulogan sa World Habitat Day sa dakbayan sa Sugbo.

Si Robredo maoy pinasidunggang mamumulong sa dakbayan sa maong kasaulogan nga gikatakdang tambongan sa nagkadaiyang non-government organizations (NGOs), urban poor groups ug mga local government unit (LGU) ug DILG regional directors nga nahisakop sa Region 6, 7 ug 8 nga ipahigayon sa College Technological Sciences-Cebu (CTS) sa N. Bacalso Ave. ning dakbayan.

Updates on President Benigno Aquino III's presidency

Usa sa mga tuki-on ni Robredo mao ang ‘housing policies and thrusts of local government units diin iyang ipasabot sa mga bisita kon unsa usab ang plano sa administrasyon ni Presidente Noynoy Aquino.

Si Konsihal Alvin Dizon, chairman sa Committee on Housing sa siyudad nga maoy nag organisar sa kalihukan, nagkanayon nga si Robredo makigtagbo usab ngadto sa urban poor communities sa dakbayan hilabi na kadtong apektado sa Provincial Ordinance 93-1.

Iya usab iyagyag sa katawhan ang iyang mga nahimu sulod sa 100 ka adlaw sa iyang paglingkod suma sa iyang gipasiatab panahon sa kampanya.

Ang konsihal nanghinaot nga niining pagbisita sa Secretario sa DILG mahatagan na ug katumanan ang pangandoy sa urban poor communities.

“We hope we can find a win win solution on the 93-1 issue with the help of the secretary,” matud ni Dizon.

Gibutyag usab sa konsehal nga human mamulong si Robredo, adunay ipahigayon nga panagtigum sa tanang mga sakop sa Liberal Party sa siyudad nga naglakip nila ni Atty. Hilario Davide III, Kongresista Tomas R. Osmeña sa South District, Kongresista Rachel Marguerite del Mar sa North District ug Cebu City Mayor Michael Rama.

Laing gi detalye ni Dizon nga makigtagbo usab ang kalihim ni kanhi City Administrator Bimbo Fernandez, chairman sa Pagtambayayong Foundation, ug lain pang 50 ka urban poor leaders aron tukion ang ilang mga problema kabahin sa ilang kasamtangang estado sa ilang pamuyo. PAC