MATAG Oktubre sa tuig, ang Pilipinas nagsaulog sa Children’s Month subay sa Proclamation No. 267 niadtong Septembre 30, 1993. Gihimo kining maong kasaulogan isip paagi sa paghatag og bili sa pag-atiman sa mga kabataan sa atong katilingban human naratipikahan sa Senado sa Pilipinas ang United Nations Convention on the Rights of the Child (UNCRC) niadtong Nobyembre 20, 1990 o 20 ka tuiga na ang milabay. Tungod niini ang DILG nagpaguwa og Memo Circular No. 2010-95 nga nagsugo sa tanang LGUs og SKs sa tibuok nasud sa pagsuporta niining maong kasaulogan.

Ang sentro sa maong kasaulogan mao ang Council for the Welfare of Children (CWC) nga naghimo og tema karong tuiga nga “Kung Bring Child ang Gusto, Mundo’y Ingatan Mo!” Ang tema karong tuiga nagpakita sa kamahinungdanon sa pag-atiman sa kinaiyahan ilabi na sa gitawag nato nga climate change aron makaseguro kita sa kaugmaon sa atong mga kabataan. Wala magpauwahi ang dakbayan sa Davao sa maong tinuig nga kasaulogan nga gipangunahan sa lokal nga CWC. Gani nag-una kini sa mga syudad nga may daghang programa og kalihukan alang sa pag-atiman sa katungod sa kabataan ilabi na nga si kanhi konsehal Angela Librado-Trinidad ang action officer sa Mayor.

Post your reaction to the Manila hostage crisis

Karong tuiga magpahigayon gihapon og opening ang CWC diha sa Centennial Park o sa Rizal Park human sa motorcade sa buntag sa Oktubre 4. Daghan pa usab nga mga kalihukan nga ilusad sa mga sakop sa CWC sa gobyerno og NGOs sulod sa usa ka bulan sama sa Children’s Congress, Hudyaka sa Kabataan og uban pa. Nidapit ang CWC sa tanan niyang mga sakop og bisan kinsang grupo nga maghimo og mga kalihukan sa ilang komunidad nga nagpakita sa ilang suporta sa kabataan sa atong panahon.

Oktubre 16: One Day United

Isip paagi sa pag-apil sa kasaulogan karong tuiga, ang pribadong sector magpahigayon usab og “One Day United” nga apil sa ilang kampanya sa Global Action to End All Forms of Violence Against Children (VAC) karong Oktubre 16 didto sa Agro Foundation/Tionko Football Field. Usa kini ka adlaw nga panagtapok sa mga bata og hamtong aron manag-ambit sa esports, kulturanhong pasundayag, libreng konsulta og medisina, parlor games, ug uban pa.

Adunay panagtigi sa football sa mga in-school og out-of-school youth og uban pang esports. Aduna say mga booths sa mga produktong gihimo sa mga NGOs og mga bata, og produkto gikan sa komunidad. Subay sa nasudnong tema sa CWC, ang tigpasiugda niini naghimo og tema nga “Nagpakabanang Kabataan Apil sa Pag-atiman sa Kinaiyahan og Katilingban” isip pag-ila sa partisipasyon sa bata sa pagsulbad sa pangkatilingbanong problema sama sa climate change, kagubot og kapobrehon. Gipasiugdahan kini sa Mindanao Action Group for Children’s Rights and Protection (MAGCRP) nga gisakupan dinhi sa Davao sa Bantay Bata 163, Kabataan Consortium og Tambayan Center.

Gisuportahan usab kini sa CWC, Davao Football Association, ABSNET, MCCR og uban pa. Busa gidapit ang tanan, ilabi na kadtong may mga bata aron mosaksi sa maong kalihukan og aron sab makabenipisyo sa mga tambal gikan sa programang Garantisadong Pambata sa DOH og CHO.