Kalsada sa Cotabato-Davao, nahugmak

APEKTADO karon ang dagan sa trapik human nahugmak ang dako nga parte sa Cotabato-Davao highway.

Gibutyag ni Aleosan Mayor Loreto Cabaya nga nag-landslide sa kilid nga bahin sa kalsada sa Barangay Bagolibas ug Dualing, hinungdan nga naglisud sa paglusot ang mga sakyanan paingon ngadto sa siyudad sa Kidapawan.

Ang hitabo resulta sa pagbaha gumikan sa grabeng pag-ulan didto sa Central Mindanao.

Giklaro ni Cabaya nga nakig-alayon na sila sa Department of Public Works and Highways (DPWH-12) aron maayo sa dali nga panahon ang dalan.

Hinuon makalusot man ang mga sakyanan apan usa lamang ka linya sa kalsada ang pwede nga magamit gumikan kay dilikado sab nga subling mahugmak ang ubos nga parte sa yuta.

Gisugo na ni Cotabato Governor Emmyloy Talinio Mendoza ang Provincial Engineering Office nga muabag sa DPWH sa pag-ayo sa mga kalsada nga gidaut sa baha.

Hangtud karon gatusan ka mga pamilya ang mihiklin sa mga ubos nga parte sa Cotabato gumikan sa pag-awas sa Rio Grande de Mindanao nga nahimong hinungdan sa grabeng pagbaha. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph