POLITIKA ang gilantaw nga motibo sa mga otoridad sa pagsunog sa mga armadong grupo sa sakyanan sa usa ka lokal opisyal sa alas 4:00 sa kaadlawon niadtong Domingo didto sa siyudad sa Cotabato.
Sigun sa nahagpat nga taho gikan sa Cotabato City Police Office nga samtang nagparada ang owner type jeep ni Asgar Badrodin, kagawad sa Barangay Bagua Dos, duol lamang sa iyang headquarter sa diha nga kalit mibutho ang duha ka wala mailhing tawo ug gisunog ang sakyanan.
Human milampos ang tuyo, misibat dayon ang mga suspetsado sakay sa usa ka XRM nga motorsiklo paingon sa wala matino nga direksyon.
Niresponde ang mga ginsakpan sa City Fire Bureau apan wala na gyud matabang ang nasunog nga owner type jeep nga gibubu-an og gasolina sa mga suspetsado.
Matud ni Badrodin nga dunay grupo nga naghulga niya nga siya tipi-on kon modagan kini sa nagsingabot nga barangay ug SK election.
Apan wa siya mahadlok gumikan kay mga tawo sa Barangay Bagua Dos ang nagtuboy kaniya nga modagan pagka-Kapitan sa ilang dapit.
Dunay mga suspek nga gidudahan si Badrodin apan iyang gisalig sa mga otoridad ang imbestigasyon sa maong hitabo. (Edgardo Fuerzas)