GIKUMPIRMA sa Bansalan police station nga wala nay makit-ang pronton sa illegal nga sugal nga last two sa lugar apan di ikalimod nga padayong nagpataya ang mga gagmayng usher.

Naglisod sab ang kapulisan nga sila madakpan sanglit daw sama sa “gerilya” ang ilang istilo nga magpahipi sa daplin aron di madakpan.

Post your reaction to the Manila hostage crisis

Ang warrant officer nga si SPO4 Uldarico Castardo nagkanayon nga padayon silang nangita og mga tigpa-last two tungod sa hugot nilang kampanya apan sa kasamtangan naglisod silang masikop ang mga nagpaluyo niini sanglit tinago-tago na ang pagpataya.

Hinuon gi-klaro niya nga nanirado na ang mga pronton nga iya sa mga dagkong financier ug dayo sab sa ilang lugar.

Kung kaniadto makit-an sa merkado publiko ang mga last two paraphernalia nga lantarang gibaligya sa mga gagmayng tindahan karon patago-tago sab ug gipili lang ang makapalit.

Usa ka tinubdan ang ni-asoy sa Sun.Star Superbalita nga daw sama sa druga nga ihanyag ang pagpataya og last two.

“Duolon ka unya ingnon ka nga motaya ka'g last two?, matod sa tinubdan. 'Ang uban ingnon ra pud ka nga pasundon ka didto sa ilang balay aron didto motaya,” dason niini.

Gihulagway nga sa cellphone ug internet na sab ipaagi ang pagtali og numero sa last two aron makaabot sa mga financier ug i-deposito ngadto sa bangko ang remittance nianang pagka-sunod adlaw.

Kini maoy paagi sa mga sugarol aron padayon silang makaduwa sa ilegal nga sugal.

Sa maong istilo giingong maglisod ang kapulisan sa pagsikop sa mga nagpaluyo niini mao nga padayon ang ilang pagpaniid. Di na sab makit-an sa lugar ang mga tari-tari, hantak ug tong-its human gilusad ang hugot nga kumpanya sa mga otoridad.

Matod sa kapulisan, bisan igmat ang mga nagpaluyo sa duwang last two apan nagtuo sila nga aduna gihapon sila'y madakpan karong pipila ka mga adlaw.

Ang usa ka tayador nga itago sa ngalang “Jean” nagbutyag nga nibiya na siya og pamatad og last two sanglit hadlok siyang maapil og kaso ugaling masakpan gawas pa nga dako na kaayo ang iyang pilde niini.

Subay sa “one strike policy” sa kapulisan, taktakon ang si bisan kinsang hepe sa pulis nga di makapaundang sa ilegal nga sugal sa ilang lugar.

Gihangyo sab sa kapulisan ang katawhan nga mobiya na pagpatad ug huna-hunaon nga mas dako pa ang ilang pilde sa makobrang kantidad ugaling maka-tsansa sa pagdaog. (Orlando B. Dinoy)