WAY nahimo ang Digos City Police Office (DCPO) sa gipatumang election gun ban human nilampos ang mga de-motorsiklong kriminal sa pagpamusil sa ilang biktima.
Usa ka lalaking pauli na unta sa lungsod sa Bansalan, Davao del Sur ang gisundan sa wa mailhing mga mamumuno ug gipusil pag-abot sa Barangay Tres de Mayo, siyudad sa Digos.
Taliwa sa kainit ug kahayag sa adlaw niatake ang mga kriminal banda alas 10 sa buntag niadtong Dominggo.
Si Orlando Tenorio, 61, minyo, nagpuyo sa Sitio Power, Barangay Tres de Mayo, kalit nalimbuwad ug nilagpot gikan sa iyang gimaneho nga motorsiklo.
Subay sa mga nakakita sa krimen, ang duha ka mga suspek nag-angkasay sa kolor itom nga Honda XRM, nagsul-ob og jacket ug kalo.
Ang nag-angkas sa motorsiklo mao ang nihulbot sa pistola nga gitakin sa iyang hawak dayon luthang sa biktima.
Biktima, naigo sa nagkadaiyang parte sa iyang lawas ug wa na madala sa bay tambalanan human diha-diha nga natibway ang kinabuhi.
Ang kapulisan nga uwahing niabot human nahitabo ang krimen igo na lang sa pag-rekober sa mga basiyong bala sa kalibre .45 pistola.
Matod pa himuon kadtong ebedensya sa pagahimuong imbistigasyon sa kaso.
Si Police Officer 3 Eugenio Corbita sa DCPO, kinsa gitahasan sa pagpalawom sa imbistigasyon, nagkanayon nga wa pa nila masuta ang motibo sa krimen.
Nahingangha sab ang katawhan kon nganong nahitabo ang pagpamusil luyo sa giingong nagmuntar og checkpoint ang kapulisan diha sa kadalanan alang sa hugot nga implementasyon sa nationwide election gun ban. (Orlando B. Dinoy)