ANG lungsod sa Sta. Cruz, Davao del Sur nga nagsaulog sa ika-126 nga sumad karong adlawa naningkamot nga mamahimo na silang usa ka dakbayan.

Gisulti ni Mayor Joel Ray Lopez dinhi sa Sun.Star Superbalita nga gusto nilang matuman ang tanang rekisitos nga gikinahanglan aron mahimong siyudad ang ilang lungsod.

Post your reaction to the Manila hostage crisis

Girason ni Lopez nga gawas nga usa ka 1st class municipality angayan silang mamahimong dakbayan sanglit anaa sa lugar ang mga dagkong planta nga naghatag og dakong kita sa ilang munisipyo.

Sa maong lugar, mga dagkong kompaniya nga nakatabang sa ilang kinitaan mao ang mga planta sa San Miguel Beer, Coco Davao, Hydroelectric Power Plant ug daghan pang uban.

Ingon nga 18 ka mga barangay sama sa Astorga, Bato, Coronon, Darong, Inawayan, Jose Rizal, Matutungan, Melilia, Zone I, Poblacion; Saliducon, Sibulan, Sinoron, Tagabuli, Tibolo, Tuban, Zone II, Poblacion; Zone III, Poblacion ug Zone IV, Poblacion maoy naglangkob sa ilang lungsod.

Apan matod ni Lopez nga ang populasyon sa ilang lugar maoy kulang aron ma-aprobahan sila sa ilang tumong.

"As of now we have more than 80,000 people so ang kinahanglan makaabot siya og 100,000," niya pa.

Alang niya dili lisod ang pagkab-ot og daghang lumolupyo sa ilang lugar sanglit matag karon ug unya adunay daghang mga tawo nga mobalhin pagpuyo sa ilang lugar.

"Kada adlaw naa gyud mag-desisyon nga diri na mopuyo sa Sta. Cruz, so we expect nga madugangan pa ang katawhan dinhi ilabi pa nga nia ang daghang ka-trabahoan," niya pa.

Gibutyag ni Lopez nga gihangyo nila si Presidente Benigno Aquino III nga motabang sa ilang sugyot ngadto sa Bureau of Internal Revenue (BIR) nga mogahin og bahin sa buwis nga gi-remit sa San Miguel Beer Corporation ngadto sa National Government.

Sumala niya nga gi-aprobahan sab sa presidente ang ilang resolusyon nga i-deklarang “holiday” sa ilang lugar matag Oktubre 5 atol sa kasumaran sa iyang pagka-lungsod.

"Our municipal government has been waging a campaign for a cut in Manila's excise tax take from the San Miguel brewery plant, estimated at P700 million annually," sumala sa mayor.

"We estimate the figure to have reached billions at an annual take of P280 million, or 40% of P700 million, since 2001,” ni Lopez pa.

Nangayo si Lopez og kwentada sa BIR kalabot sa buwis nga gibayaran sa maong kompaniya didto sa kauluhan apan dason niya wa pa sila gitubag.

Dungan sa selebrasyon gipataas sab sa kasundaluhan ug kapulisan ang ilang alerto alang sa kahapsay'g kalinaw sa lugar. (Orlando B. Dinoy)