SUBLING nagprotesta kagahapon ang mga militanteng mag-uuma sa padayong militarisasyon sa kabukiran ilabina didto sa distrito sa Paquibato, siyudad sa Davao.
Nag-ulo sa protesta mao ang pundok sa Paquibato District Peasant Alliance (PADIPA), Farmers Association of Davao City (FADC), Kilusang Magbubukid ng Pilipinas (KMP) ug PASAKA Confederation of Lumad Organizations in Southern Mindanao Region didto sa City Hall Drive, ning siyudad.
Panawagan sa maong pundok mao ang hinanaling pagpahunong sa pangayaw sa Paquibato District ug undangon sa Armed Forces of the Philippines (AFP) ang paggamit sa mga lumad ug mag-uuma sa gilusad niini nga kontra-insurhensiya nga kampanya sa gobyerno, sigun sa PADIPA nga gipangulohan ni Celso Bughao.
Sila nanawagan sab sa hinanaling imbestigasyon sa pagpusil patay kang Julius Tamondes ug Reynaldo Labrador niadtong miaging buwan didto sa distrtio sa Paquibato.
Gawas niini, buot nilang paimbestigahan ang pagpanghulga sa kinabuhi nila Angelino Gentorales, Dodo Cabatuan, Jimmy Bohesan ug sa ubang mga molupyo sa Paquibato District.
Ang pundok ni Bughao nanawagan sab nga disarmahan, bungkagon ang Alamara Bagani Forces, Barangay Defense System, Cafgu ug ATADI nga gipangulohan ni Datu Ruben Labawan.
Buot sab nilang ipakansela sa National Commission on Indigenous Peoples Commission (NCIP) ang Certificate of Ancestral Domain Claims (CADC) nga giisyu niini ngadto kang Datu Ruben Labawan kinsa maoy nag-ankon sa kapin 32,000 ektaryas nga yuta didto sa Paquibato.
Nabalaka ang pundok ni Bughao sanglit dunay aplikasyon ang Alberto Mining ug Superfields Mining sa 8100 ektaryang luna sa Paquibato nga buot momina sa maong lugar.
Sila supak usab sa pag-implementar sa mga sundalo ug Cafgu sa mga development projects sa ilang lugar pinaagi sa pagsulti nga ang angay nga moimplementar niini mao ang katawhang lumad sa ilang lugar.
Ang pundok ni Bughao subling nanawagan sa kagamhanan nga respetuhon ang ilang katungod sa pag-ugmad sa yuta ug labaw sa tanan ang kultura sa mga lumad. (AD)