DUHA ka mga tawo na sab ang sunod-sunod nga gipamusil sa wa mailhi nga mamumuno sulod lamang sa 13 ka oras dinhi siyudad sa Davao.
Ang unang insidente miresulta sa kamatayon sa usa ka drayber sa alas 12:05 sa hapon niadtong Dominggo didto sa Crossing Talomo samtang ang ikaduhang insidente nahitabo sa ala 1:00 sa kaadlawon kagahapon didto sa kanto Palma Gil ug CM Recto, ning siyudad.
Gipusil didto sa Crossing Talomo mao si Richard Jaylo David, hamtong ang pangidaron ug nagpuyo sa Crossing Talomo, base sa imbestigasyon ni Police Officer 2 Ronald Baguio sa Talomo Police Station.
Si David nakaangkon og samad pinusilan sa iyang ulo nga miresulta sa iyang kamatayon human siya gipusil sa usa ka tawo nga nagsakay og motorsiklo.
Mga nakasaksi nagbutyag sa kapulisan nga nagtindog lamang ang biktima atubangan sa GM Bakeshop dihang miabot ang usa ka tawo nga nagsul-ob og helmet.
Ang maong tawo maoy mipusil sa biktima gamit ang usa ka .45 kalibre nga pistola, base sa nahipus nga basiyo sa mga sakop sa Scene of the Crime Operatives (Soco).
Samtang mipahilayo ang killer kinsa misakay sa motorsiklo nga way plate number ug gimaneho sa laing tawo, giugkat sab ang patay'ng lawas sa biktima ug gipahiluna didto sa St. Peter's Funeral Homes.
Samtang ang tawo nga gipusil didto sa kanto Palma Gil ug CM Recto mao si Jonathan Saavedra, 24, ulitawo, laborer ug nagpuyo sa Carpenter, Barangay Leon Garcia, ning siyudad.
Si Police Officer 2 Danilo Alngog sa San Pedro Police Station nagbutyag sa iyang spot report nga ang biktima naglakaw lamang didto sa nahisgutang lugar apan gisundan siya sa mamumuno dayon gipusil tumong sa iyang ulo.
Matud ni Alngog nga ang biktima namatay dayon human siya gipusil mao nga gidala ang iyang patay'ng lawas didto sa Angel Funeral Homes.
Nakuha sa kapulisan gikan sa crime scene ang duha ka baseyo sa bala sa .45 nga pistola nga maoy gigamit sa mamumuno.
Mga imbestigador sa Talomo ug San Pedro Police Station naningkamot karon nga maestablisar ang motibo, mailhan ug masikop ang mga suspetsado. (Alger Dura)