WALO ka mga pasahero nangaangol human ang manubela sa ilang gisakyang naghaguros nga bus depasaheroan niungot hinungdan nga nibangga sa kural sa usa ka balay niadtong Martes sa udto sa SitioTimbacol Barangay Putat, Tuburan, Sugbo.
Naukay ang mga residenti sa lugar human ang Richie Bus Liner (GWJ-569) nga gimaniho ni Rodolfo Brigoli, taga Barangay Dakit, Sogod nibanga sa pader sa balay ni Aurora Diola nga nakaangol sa walo ka mga pasahero.
Sa imbestigasyon nila ni PO2 Bismarck Babiera ug mga kauban sa Tuburan Police gikatahong ang bus nga dunay rota sa Cebu City-Tuburan paingon sa lungsod nga naghaguros sa pagdagan.
Sa ilang pag-abot sa maong dapit, kalit lang ni malfunction ang manubela sa bus hinungdan nga didto nisampak sa kural sa balay ni Diola.
Maayo gani kay way naunsa sa mga tagbalay.
Tungod sa ka kusog sa impact ang mga pasahero nangaangol.
Mga estambay ug mga residenti sa lugar nga nakakita sa insedenti daling ningtabang sa walo ka mga pasaherong nangaangol ug gidala sa Tuburan District Hospital.
Hinuon luwas na sila sa makuyaw nga kahimtang samtang ang driver kinsa gidakop sa kapulisan gibuhian sa pagkahapon sa maong adlaw.
Si Insp. Welther Grapa, hepe sa Tuburan Police nga nahinabi sa Sun.Star Superbalita, niingon nga nagkasabot ang mga biktima ug tag-iya sa bus nga igsuon sa driver.