NANAWAGAN ang Commission on Elections (Comelec) ning siyudad sa Cagayan de Oro niadtong mga mokandidato sa pagduso na sa ilang certificate of candidacy (COC) ug dili na ipaabot sa katapusang adlaw sa gihatag nga tagal.
Pinaagi niini malikayan ang kadaghan sa mga mo-file sa ilang COC karong Oktubre 13, 2010 alang sa umaabot nga piliay sa barangay ug Sangguniang Kabataan (SK) karong Oktubre 25.
Usa ka sakop sa City Comelec nga nahinabi sa Sun.Star Superbalita niingon nga kung mahimo mobisita na dayon sa ilang buhatan og magpa-photocopy sa aplikasyon ug i-fill up daan aron dili na malangan.
Mahimo usab nga ma-download ang application form sa website sa Comelec niadtong buot mokandidato aron dili na mahago pagkuha niini sa buhatan sa Comelec.
Samtang ubay-ubay na usab ang mga mi-file sa aplikasyon ning panahona apan namatikdan nga kadaghanan niini SK ang ni-apply hinungdan nga gilaumang mas modaghan pa ang mo-file sa sunod nga mga adlaw.
Ning ulahi Si Kapitan Claro Derecho sa Barangay Puerto nakaduso na sa iyang COC aron magpasubli pagka-kapitan sa iyang barangay.
Samtang si Kapitan Alexander dela Cerna sa Barangay 26 nibutyag nga posibleng sa katapusang adlaw na siya moduso sa iyang COC sumala sa naandan.
Kahinumduman nga matapos ang filing karong petsa 13, samtang magsugod ang kampanya sa petsa 14 hangtod petsa 23 ning bulan.
Gipasabot usab sa Comelec nga tungod sa kaapeke sa panahon naglisod sila nga ipahigayon ang automated polls ug mahulog gyud kini sa mano-mano.
Ning panahona padayon pang gihulat sa City Comelec ang mga supply alang sa umaabot nga eleksiyon ug anaa pa sa kaulohan ning panahona. (Stephanie V. Berganio)