UV nasalbar sa quotient

MAGBAWON og taas kaayong moral ang University of Cebu (UC) Webmasters sa ilang pagsulod sa finals kay ilaha mang gipangbuntog ang 9-time champion University of the Visayas (UV) Green Lancers, 68-63, sa miaging gabii sa pagtiklop sa semi-final round sa Cebu Schools Athletic Foundation Inc. (CESAFI) college division sa Cebu Coliseum.

Gawas sa ilang kadaugan batok sa Green Lancers, ang Webmasters ni coach Rhoel Gomez wala gyud nakatilaw og pildi gikan pa sa quarterfinals nga seguradong makasamot sa ilang pagsalig sa kaugalingon.

"The Manny Pacquiao Blog". Click here for stories and updates on the Filipino boxing champ.

Importante gyud kaayo nga taas ang moral sa Webmasters kay Green Lancers ra man gihapon ang ilang ikasangka sa best-of-five championship series.

Ang Green Lancers nasulod sa triple tie sa 1-2 nga rekord sa single-round robin semi-finals kauban ang University of San Carlos (USC) Warriors ug Southwestern University Cobras.

Nahitabo ang triple tie kay gilupig man sa Warriors ang Cobras, 86-76, sa laing duwa.

Nasuwertihan pa gyud ang Green Lan­cers ni coach Elmer Cabahug kay sila maoy mipatigbabaw sa quotient ug nakakuha pa sila’g kahigayunan nga madepensaan ang ilang korona.

Kon nahitabo pa nga niabot og 12 puntos ang labaw sa kadaugan sa Warriors batok sa Cobras, hayan ang Warriors gyud unta ang molabaw sa quotient ug maoy makigbatok sa Webmasters sa finals.

Sama sa naandan, ang Webmasters gipa­ngulohan na sab sa ilang higante nga si Junmar Fajardo, kinsa nipugnit og 21 puntos samtang nidugang og 10 puntos si Lugi Bercede.

Sa laing bahin, magsangka ang Warriors ug Cobras sa main game karong hapon sa pagsugod sa ilang best-of-three series sa inilugay sa ikatulong dapit.

Samtang sa premirong duwa, mag-abot ang UV Baby Green Lancers ug UC Baby Webmasters aron sugdan sab ang ilang kaugalingong series sa inilugay sa ikatulong dapit sa high school division.

Puntos

USC (86)- Panerio 21, Padillo 20, Hermosa 20, Codilla 10, Otida 5, Cantonao 5, Cortes 2, Uy 2. SWU (76)- Pacquiao 18, Armecin 16, Litorja 13, Django 10, Maguate 10, Pria 2, Ortuyo 2.

UC (68)- Fajardo 21, Bercede 10, Ampoon 8, Juliane 8, Mohammad 7, Heruela 7, Pao 6. UV (63)- Abad 18, Olivares 10, Calo 10, Lao 8, Cincoflores 5, Saycon 4, Mercader 4, Silva 2, Avillanosa 2.